Los Emmy van celebrar una gala en formato pandemia

Los Emmy, los premios más importantes de la televisión estadounidense, camudaron de planes y van celebrar el próximu 19 de setiembre una gala más acutada pol aumentu de casos per andanciu de covid-19 y la espansión de la variante delta.

L’Academia de la Televisión d’EEXX va entamar una ceremonia n’esteriores, a la que solo van poder asistir cuatro representantes de cada equipu nomáu y apenes va haber prensa acreditada, tolo contrario al formatu orixinal col que Hollywood pensaba dar la bienvenida a la normalidá. “Tres les conversaciones con espertos en salú y seguridá del condáu de Los Ánxeles, l’Academia llegó a la conclusión de que tenemos de llindar entá más el númberu de nomaos que van asistir”, informó la organización nun comunicáu.

A mediaos de xunetu, cuando s’anunciaron les nominaciones, el númberu de nuevos casos diarios de coronavirus en Los Ánxeles malpenes superaba’l millar. Un mes dempués, la media diaria asítiase en redol a 4.000 y sigue xorreciendo. Lo mesmo asocede n’EEXX, que rexistra una media de más de 100.000 positivos diarios, llueñe de los 20.000 que detectaba va un mes. La rápida crecedera de casos y el ritmu lentu de vacunación paralizaron la reapertura d’EEXX, onde les grandes ciudaes como Nueva York, Los Ánxeles y San Francisco volvieron imponer l’usu del mázcaru n’interiores y acutar les xuntes sociales.

Al respective de los premios, ‘The Crown’ y ‘The Mandalorian’ apoderaronse de 24 candidatures per cabeza nes nominaciones pa la 73 edición de los Emmy. Por detrás asitióse la producción de Marvel ‘WandaVision’, que llogró 23 candidatures. ‘The Boys’, ‘Bridgerton’, ‘The Crown’, ‘The Handmaid’s Balte’, ‘Lovecraft Country’, ‘The Mandalorian’, ‘Pose’ y ‘This is Us’ van ser les candidates al premiu a la meyor serie dramática. Pela so parte, la reconocencia a la meyor comedia va decidise entre ‘Black-ish’, ‘Cobra Kai’, ‘Emily in Paris’, ‘Hacks’, ‘The Flight Attendant’, ‘The Kominsky Method’, ‘Pen15’ y ‘Ted Lasso’. L’Emmy a meyor serie llindada va poder dir a ‘WandaVision’, ‘Mare of Easttown’, ‘I May Destroy You’, ‘The Queen’s Gambit’ y ‘The Underground Railroad’.