Los comerciantes afectaos pola quema de Uría 58 van reabrir esti sábadu

El conceyal d’Economía y Emplegu, Rubén Rosón, anunció que los comerciantes afectaos pola quema del edificiu de la cai Uría 58 van poder reabrir los sos negocios al públicu este mesmu sábadu anque evitó poner fecha a la reapertura al tráficu de la cai.

Rosón realizó esti anunciu mientres la rueda de prensa qu’ufiertó acompañáu pola presidenta y el xerente de l’Asociación d’Autónomos y Comerciu d’Uviéu (ADACO) , Marta Pérez y Juan Carlos Canteli, pa dar a conocer la Feria de Primavera que va desenvolver el comerciu de Uría esta fin de selmana en La Llosa.

La presidenta de ADACO empezó la so intervención recordando al bomberu fináu na quema de Uría y estimando la collaboración del Conceyu y la plataforma d’afectaos pola quema nesta iniciativa que busca “beneficiar non solo a los negocios afectaos pol accidente sinón a tol pequenu comerciu d’Uviéu que lo ta pasando mal”. Pela so parte, el xerente de ADACO, Juan Carlos Canteli, esplicó que la plataforma d’afectaos pola quema ta integrada por 27 negocios de la cai Uría y Melquiades Álvarez, anque apuntó, tamién afectó a los comercios de les cais Cuadonga, Nueve de Mayu ya Independencia.

Amás de la feria comercial que se celebra en La Llosa y que va permanecer abierta tola fin de selmana, pa impulsar el comerciu nesta exa comercial, dende ADACO van distribuyise bonos de parking gratuitos, cheques regalo, promoción de la zona en guíes o otres ufiertes col fin de revitalizar les vientes. Canteli añedió nesti sentíu que se van realizar campañes d’incentivu de compra con periodicidad mensual.