Los centros culturales d’Avilés van acoyer 43 actividaes hasta final d’añu

Los centros culturales d’Avilés van acoyer 43 actividaes hasta final d’añu en Versalles, La Xungarosa/La Lluz, La Carriona y la biblioteca Bárganos Candamo, cuntando teatru, música, cuentacuentos, talleres d’animación a la llectura y cine n’asturianu y bebecuentos.

La programación de los centros socioculturales d’Avilés hasta final d’añu va arrexuntar 5 actividaes más que l’últimu trimestre del añu pasáu. Ente les 43 actividaes podrá esfrutase de teatru pa tou tipu de públicos, música, cuentacuentos, talleres d’animación a la llectura, bebecuentos y como novedá va haber un taller de cine n’asturianu. Los actos van tar partíos polos barrios d’Avilés, con programación en Los Canapés (19 actividaes), La Xungarosa/La Lluz (7), La Carriona (7) y Bárganos Candamo (10).

El Teatru de Los Canapés va ser la see del ciclu de Teatru Familiar que va acoyer seis espectáculos p’averar la maxa y la fantasía del teatru al públicu más nuevu, pero qu’ensin dulda van poder ser esfrutaos tamién pol restu de la familia. Les representaciones, incluyíes nel Circuitu de les Artes Escéniques del Principáu d’Asturies, van ser a les 18.00 hores.

Los títulos que podrán esfrutase son los siguientes: Un duende nes nubes, estrenu de la compañía Hixénicu Papel Teatru (6 d’ochobre), ¿De qué color  ye’l sol? de Kamante Teatru (13 d’ochobre), Apestosos pero sabrosos de David Acera Creaciones (3 de payares), El mundu de Albertito de Roca Suárez (17 de payares), Cuentu de navidá de Charres Dickens de Saltantes Teatru (1 d’avientu) y Piccolo camarín d’Adrián Conde (22 d’avientu).

Tamién nel Teatru de Los Canapés va tener llugar la XI Amuesa de Teatru Amateur, con seis obres: Fabes S.A de la compañía El Horreo de Barcia (16 d’ochobre), Nun me llames Bernardo que soi Irene de Teatru Carbayín (30 d’ochobre) El tontu de La Capacha Teatru (13 de payares), La maquina de retratar de la compañía Asturiana de Comedies (20 de payares) y Nun ye tan fácil de Corocotta Teatru, la compañía d’intercambiu d’esta edición procedente de Cantabria (25 de payares). Amás, el día 11 d’avientu celebrará la gala del fin de l’amuesa. Toles funciones van empezar a les 19 hores.

Nos centros de La Xungarosa/La Lluz (6 y 7 d’ochobre), La Carriona (3 y 4 de payares) y Los Canapés (15 y 16 d’avientu) va celebrase’l taller de cine n’asturianu: “Fai’l to propiu curtiometraxe” empobináu a públicu d’ente 10 y 16 años. Pa participar nos talleres, que son gratuitos, ye necesario inscribise nes biblioteques; hai 15 places per cada centru y taller. Les sesiones van ser los vienres de 17.30 a 19 hores y los sábados de 11.30 a 13.00 hores.

Les biblioteques de Bárganos Candamo, La Carriona, La Xungarosa/La Lluz y Los Canapés van acoyer talleres infantiles d’animación a la llectura dirixíos a un públicu d’ente 4 y 8 años. La compañía “El Gatu Turulatu” va ser la encargada de realizar estos talleres, que’l so oxetivu ye contribuyir a engabitar, al traviés del xuegu, a los neños y neñes a la llectura.

Na biblioteca infantil Bárganos Candamo van celebrase los domingos 15 d’ochobre, 19 de payares y 3 d’avientu a les 12.00 hores; en La Carriona van ser los miércoles 18 d’ochobre, 15 de payares y 20 d’avientu a les 18.00 hores; los miércoles 25 d’ochobre, 22 de payares y 13 d’avientu van tener llugar en La Xungarosa/La Lluz a les 18.00 hores y en Los Canapés van esfrutase los xueves 26 d’ochobre, 9 de payares y 30 de payares tamién a les 18.00 hores.

El públicu infantil d’ente 4 y 9 años tamién va poder esfrutar colos cuentacuentos que se van a programar nos cuatro equipamientos. Cuentos encaxaos de Factoría Norte va representar n’ochobre en Bárganos Candamo (día 6), La Xungarosa/La Lluz (día 18), Los Canapés (día 20) y La Carriona (día 25). Na Gloria de Tres la Puerta Títeres podrá esfrutase nel mes de payares en La Xungarosa/La Lluz (día 15), Bárganos Candamo (día 17), La Carriona (día 22) y Los Canapés (día 24). A lo último, Malvaos de cuentu, d’Ana Capiya, va ufiertar al públicu n’avientu en Bárganos Candamo (día 1), La Xungarosa/La Lluz (día 13), Los Canapés (día 14) y La Carriona (día 15). Toles sesiones van ser a les 18 hores.

Amás d’esto, la biblioteca infantil de Bárganos Candamo va acoyer un ciclu de Bebecuentos llamáu Los nuesos cuentos que va tar al cargu de Elisabet Martín Teatru. Van ser trés sesiones (14 d’ochobre, 4 de payares y 2 d’avientu a les 12 hores) dirixíes a un públicu d’ente 6 meses y 3 años coles que se trata d’averar el mundu de los cuentos dende la edá más temprana.

La música volverá tar presente na programación col conciertu Música na Biblio que va tener llugar el 21 de payares a les 18 hores na sala infantil de la biblioteca Bárganos Candamo.