Los centros asturianos celebren el Día de la Llingua Materna esti vienres 19 de febreru

“El cuidáu y la responsabilidá de calterner una llingua materna como la nuestra ye un llabor de toos/es y un apueste de futuru”. Con esti slogan, la Conseyería d’Educación anima esti vienres 19 de febreru a toles comunidaes educatives a celebrar el Día de la Llingua Materna.

Por cuenta de la celebración del Día Internacional de la Llingua Materna, dende la Conseyería d’Educación y Cultura anímase como tolos años a toles Comunidaes Educatives del Principáu d’Asturies a participar na llectura y reflexón de los manifiestos que s’acompañen.

• Información Día de la llingua materna. Asturiano. Primaria (pdf)
• Información Día de la llingua materna. Asturiano. Secundaria (pdf)
• Información Día de la llingua materna. Gallego-asturiano. Primaria (pdf)
• Información Día de la llingua materna. Gallego-asturiano.  Secundaria (pdf)

Los manifiestos que puen descargase falen de la Conferencia Xeneral de la UNESCO que proclamó en payares de 1999 que’l 21 de febreru de cada añu diba celebrase’l Día Internacional de la Llingua Materna. Y asina, dende l’añu 2000, acútase esta fecha pensada pa promover el multillingüismu y la diversidá cultural.

Nesti añu 2016, y acordies colos oxetivos establecíos na Axenda de Desenvolvimientu Sostenible pal 2030, la UNESCO escueye un lema nuevu pal Día de la Llingua Materna: Educación de calidá, llingua (llingües) d’enseñanza y resultaos d’aprendizaxe. La intención que tien la UNESCO ye dexar bien a les clares la importancia de tolos idiomes, y n’especial les llingües maternes, p’algamar una educación de calidá. L’usu de les llingües minoritaries, asegura l’organismu internacional, aumenta la calidá de la educación, meyorando les capacidaes de comprensión y creatividá; y favorez, nes interacciones del aula, un arriquecimientu de les rellaciones sociales y de les estratexes comunicatives.

Y asina, “el dominiu y l’usu de toles llingües, tamién de la llingua asturiana, ameyora la competencia nesti ámbitu y en tolos aspectos onde’l llinguaxe ye una ferramienta necesaria pa entender, compartir, rellacionase y aprender. N’Asturies tenemos una llingüa materna, l’asturianu, que podemos aprender na escuela, nel institutu o en casa. Que podemos escuchala na música o lleela nos cuentos y nos llibros. Falar l’asturianu ye, en definitiva, abrir una puerta al conocimientu de lo nuestro, ye abrir una ventana a otres llingües romániques y ye abrir los güeyos a un mundu enllenu de posibilidaes“.