Los blogueros qu’usen l’asturianu van celebrar el II Sidra&Blogues a finales de febreru

La Casa de los Alberti de Ciañu, en Llangréu, va acoyer el segundu alcuentru de los blogueros qu’usen l’asturianu nes sos publicaciones pal 20 de febreru. L’actu, que cunta cola collaboración de Softastur, Xareos! Xestión Cultural y el propiu Ayuntamientu, va cuntar con charres, presentación de proyectos y la entrega del premiu al Meyor Blogue n’asturianu 2009.

El I Sidra&Blogues foi n’Uviéu dempués d’una manifestación pola oficialidá, un 24 de payares de 2007 y sirvió pa que los blogueros tomaren un primer contactu. Nesti segundu alcuentru, les actividaes van ampliase, ganando n’importancia’l foru.

Les votaciones pal Premiu pueden unviase tovía al corréu votalmeyorblogue@gmail.com y hasta’l 31 de xineru, siempres que se seya titular d’un blogue n’asturianu.