Llangréu presenta la campaña “Equí tas en casa”

L’Ayuntamientu de Llangréu pon en marcha la campaña EQUÍ TAS EN CASA ente’l sector hosteleru del conceyu. Ye esta una campaña específica p’actuar sobre’l sector hosteleru y que pretende normalizar l’usu del asturianu faciéndolu visible. La campaña EQUÍ TAS EN CASA va ufrir material de diversu tipu pa que restoranes, hoteles, cases rurales, sidreríes, cafeterías, chigres, centros sociales… puedan usar l’asturianu na rellación colos/es sos veceros/es.
Los oxetivos principales de la campaña son dos:

• D’un llau, fomentar el consumu nel sector hosteleru del Conceyu de Llangréu. Lo que se pretende ye respaldar l’actividá de los hosteleros de Llangréu, sumándomos con esta campaña a otres formes de promoción que tienen entamaes. Paezmos que la llingua asturiana pue ser un reclamu publicitariu más, que casa mui bien cola idea de cercanía y tratu personalizáu. La campaña ufierta instrumentos útiles pa l’asturianización del sector, asitiándose dientro d’un procesu más ampliu de modernización d’esti y d’incrementu de la calidá na atención al cliente.
• D’otru llau, que la hostelería del nuestru conceyu se convierta n’axente dinamizador de la Llingua Asturiana. Búscase tamién reforzar y esparder la llingua asturiana, dando seguridá y información clara. Consideramos que la llingua asturiana ye tamién una forma de definir la personalidá de los nuestros servicios, ye, cada vez más, una ventaxa competitiva, un valir añadíu pa los nuestros bares restoranes, cafeteríes y sidreríes. La llingua asturiana ye una seña d’identidá propia de gran interés pa turistes y visitantes y sobre too pa la xente del conceyu, presentándose como un valor de proximidá y d’apreciu polo propio, y sobre manera supón una meyora na calidá de los servicios al garantizar que los/les clientes seyan atendíos na so llingua.

Los hosteleros y hosteleres de Llangréu que quieran participar de la campaña van beneficiase de los materiales que vienen darréu:

• Pegatines cola imaxe identificativa de la campaña.
• Carpetes cola imaxe de la campaña y que van sirvir pa presentar los materiales.
• Mantelos individuales cola imaxe de la campaña, testu imformativo-divulgativu de la llingua asturiana, xuegos…
• Rótulos identificativos cola imaxe de la campaña (ACUTAO, HOMES, MUYERES, PRIVAO, TELÉFONU, ABIERTO/PESLLAO).
• Rotulación distintiva aplicación nueva llei del tabacu cola imaxe de la campaña (dos modelos rótulos con testu y pictograma identificativu).

La campaña ta coordinada pol Serviciu de Normalización Llingüística del Ayuntamientu de Llangréu organismu que va ufrir a tolos y toles hosteleros/es del conceyu el sofitu afayadizu pa la creación personalizada de platos y menús en llingua asturiana.
L’Ayuntamientu de Llangréu asume’l coste económica d’una campaña que se diseñó en collaboración cola Rede de Normalización Llingüística nos Conceyos y va ponese en marcha, amás d’en Llangréu, nos conceyos y mancomunidaes de Xixón, Mancomunidá del Cabu Peñes, Siero, Samartín del Rei Aurelio, Mieres, Cangas del Narcea y Mancomunidá de la Sidra. Amás d’en L.lena y Avilés onde la campaña yá ta funcionando.