Esposición sobre la vida de les muyeres palestines

El Colectivu Milenta Muyeres presenta’l 19 de xineru, a partir de les 19,30 hores na Galería Espacio Líquido de Xixón, los materiales de la campaña de solidaridá cola causa de les muyeres palestines que l’asociación feminista vien desenvolviendo. Ente estos materiales destaca la edición del llibru “Palestinas” nel qu’a les ilustraciones de Toni Acebal s’axunten les firmes d’escritores como Rosa Regás, Nuria Varela, Pilar Rubiera, Beatriz Redondo o Berta Piñán.

Amás d’esti llibru l’amuesa instalada na Galería Espacio Líquido constará d’una videoinstalación del colectivu Fiumfoto titulada “Biladuna, Nuestra Patria”, un trabayu conceptual qu’arrodia al espectador y que lu adentra dientro de la realidá del pueblu palestín.
El colectivu Women in War (Muyeres en guerra) presentá dientro d’esta campaña la so instalación d’elementos audiovisuales venceyaos a la guerra en xeneral, y al papel de la muyer na mesma en particular.
L’amuesa complétase cola esposición de les semeyes de la fotógrafa asturiana Eva Pividal sobre’l pueblu palestín.