L’Institutu Cervantes abre en Washington y va reabrir en Xibraltar

L’Institutu Cervantes vieno acabante empecipiar los trámites pa tener una see en Washington y reabrir la de Xibraltar, según el so director, Luis García Montero, qu’anunció un aumentu del 5 % nos próximos presupuestos para esta institución y l’inauguración d’un Muséu de la Llingua en Madrid.

N’una entrevista con Efe asoleyada esta selmana, García Montero dixo nun entender cómo l’Institutu Cervantes nun cunta con una see en Washington, “la capital del mundu”, especialmente nun momentu nel que se vive “una situación histórica difícil” na que se tán xenerando “ofienses” al español y a dellos países de la comunidá hispanofalante. Amás de la capital norteamericana y la próxima apertura de les instalaciones del Cervantes en Dakar (Senegal), va reabrise la see qu’había en Xibraltar, que s’inauguró en 2011 y cerróse en 2015 por motivos políticos.

A partir d’ende, los planes del institutu pasen por espandise per Asia, onde funcionen perbién les sedes de Tokio, Pequín y la estensión qu’hai en Xangai: “La institución que puede apurrir la enseñanza l’español ye l’Institutu Cervantes; la RAE puede sofitar la investigación pero a nós correspuéndenos la enseñanza del español naquelles tierres”, señaló en referencia a la recién apertura d’un centru d’investigación per parte de l’Academia de la Llingua nesa ciudá china.

A la so llegada al Cervantes el pasáu 30 de xunetu, el poeta García Montero sosprendióse, confesó güei, pola modestia de los sos presupuestos, sobremanera si comparense colos que tienen el British Council, la Alliançe francesa o l’Institutu Goethe, que bazcuyen ente los 700 y los 450 millones d’euros, frente a los 60 millones que recibe del Estáu la institución encargada del espardimientu del español nel mundu. Xuna aportación que, xuntu colos pocu más de 60 millones d’ingresos que xenera’l Cervantes, tienen de sirvir pa caltener la plantiya de los más de 80 centros que tien l’institutu en 44 países.