L’espardimientu de la llingua na Universidá protagoniza una xornada esti xueves

Esti xueves 10 de Marzu, nel Aula Rector Alas, na Cai San Francisco d’Uviéu, va desenolvese una Xornada que baxo’l nome de “Espardimientu ya impactu de la llingua asturiana” entama la Universidá pa aldericar sobre la presencia de la llingua nel contestu universitariu.

Esta actividá enmarcada nel ámbitu de la estensión universitaria y que cunta col sofitu de la Xunta Pola Defensa de la Llingua (XDLA), el Seminariu de Filoloxía Asturiana (SFA) y ediciones Trabe, ente otres entidaes, va entamar a les 9 hores cola acreitación y entrega de materiales.

A les 9,30 hores fadrase la llección inaugural, “La presencia de la Llingua Asturiana na Universidá d’Uviéu: historia, actualidá y perspectives”, que va correr al cargu de  Xulio Viejo Fernández, Profesor Titular de Filoloxía Española la Universidá d’Uviéu y miembru del grupu d’Investigación Seminariu de Filoloxía Asturiana.

A les 12 hores ta programada una Mesa Redonda sobre “La Llingua Asturiana como llingua vehicular nos distintos medios d’espardimientu y divulgación” que moderada por Ramón d’Andrés Díaz, Coordinador del grupu d’Investigación Seminariu de Filoloxía Asturiana, va cuntar cola participación d’Ana Isabel González, Direutora del Serviciu de Publicaciones de la Universidá d’Uviéu, José Muñiz Fernández, direutor de una revista d’impactu, Xuan Xosé Sánchez Vicente, escritor y ensayista, Antón García, ensayista, traductor ya editor, y Esther Prieto, representante de la Editorial Trabe.

Tres de la xinta les actividaes van tornar a les 15,15 hores: con “Deprendemos Llingua Asturiana cola Xunta pola Defensa de la Llingua Asturiana”, un taller Práuticu pa guah.es y adultos, al que va siguir a les 16 hores la presentación de la esperiencia didáctica “La Llingua Asturiana nel procesu d’enseñanza-aprendizaje de la Conocencia Social, Natural y Cultural”, al cargu de Jesús García Albá
Catedráticu de la Escuela Universitaria de Maxisteriu.

A les 16,45 hores ta prevista la presentación del llibru “Nel ríu la fame” de Pilar Arnaldo, que va presentar Marta López Fernández, Profesora y escritora. Y a les 17,30 hores celebrarase un recital de poesía n’asturianu con Pablo Texón, Xuan Bello, Marta Mori d’Arriba, Fame Poetika y Alejandro Fernández Osorio

A les 19 hores darase la llección de clausura, “Nós tamién tenemos Hestoria”, por María Belén San Pedro Veledo, Profesora del Departamentu de Ciencies de l’Educación de la Universidá d’Uviéu ya investigadora.