Les subvenciones de promoción al asturianu retrásense respecto a 2003 por un trámite final

Falta la firma final. El paquete de subvenciones pa la promoción de la llingua asturiana correspondientes al exerciciu de 2004 esperimentará un pequeñu retrasu nel so trámite completu de resolución respecto al añu pasáu, yá que les propuestes de concesión y denegación esperen la firma de la conseyera de Cultura, Ana Rosa Migoya, que regresa de vacaciones a primeros de setiembre, pa poder ser publicaes nel Boletín Oficial del Principáu. En 2003, esa publicación materializóse’l 16 d’agostu.

Magar d’esi retrasu técnicu respecto al añu pasáu, que nun se prevé llargu, fontes de la Conseyería de Cultura cuestionaron que la postergación na publicación de la resolución -fechu que-yos da calter de firmes ya oficiales a les subvenciones concedíes- vaiga traducise nun retrasu nel cobru de les ayudes, y precisaron que los solicitantes yá tienen o puen tener información de la cuantía concedida, o de la denegación, al traviés de la Oficina de Política Llingüística’l Principáu.

El director d’esti organismu, Ramón D’Andrés, estudia modificar la política de concesión de subvenciones de promoción en toles estayes de la llingua asturiana a partir de la convocatoria del añu prósimu, col envís declaráu d’evitar “inercies qu’obliguen a subvencionar proyectos poco comprometíos cola normalización”.

Nel casu de les ayudes económiques directes a los conceyos pa la protección y emplegu de la llingua asturiana, les solicitúes medraron esti añu nun 50 por cientu, yá que de les 108 peticiones empopbinaes polos ayuntamientos a Cultura nel añu 2003 pasóse a más de 150 espedientes na convocatoria de 2004.