Les opiniones de los escolinos nel II Plan d’Infancia van llegar hasta Naciones Xuníes

Les opiniones de los neños de la ciudá sobre l’II Plan d’Infancia d’Avilés van llegar hasta la ONU, según anunció esti día la conceyala de Mocedá, Raquel Ruiz, que destacó que de les 31 acciones que recueye’l documentu desenvolviéronse diecinueve.

«Fueron los alumnos quien fueron decidiendo, col testu na mano, a qué midíes dar prioridá y cómo desenvolver cada actuación», indicó Ruiz en participando nuna xunta d’evaluación del documentu xuntu con representantes del Conseyu d’Infancia y Adolescencia d’Avilés.

El plan inclúi midíes ellaboraes polos mozos y estructuraes en cuatro árees en realizando, mientres más d’añu y mediu, 850 encuestes a los sos compañeros de colexu ya institutu y tres xuntes con técnicos y espertos en diverses árees.

Una de les midíes foi la redacción de derechos que nun tán recoyíos na Convención de los Derechos del Neñu. Una actividá desenvuelta pol grupu de secundaria del Conseyu de la Infancia y la Mocedá y que recibió l’atención de UNICEF y del Observatoriu de la Infancia del Principáu d’Asturies. UNICEF España axuntó esti apartáu del II Plan de la Infancia d’Avilés al Informe sobre’l Grau de Cumplimientu n’España de la Convención de Derechos del Neñu.