Les nueves tendencies na llingüística asturiana axunten a investigadores del 6 al 9 d’ochobre nel Milán

El salón d’Actos de la Facultá de Filoloxía (nel Campus d’El Milán, n’Uviéu) va acoyer dende’l llunes 6 al xueves 9 d’ochobre unes Xornaes de Trabayu (Woprkshop) qu’entama’l Seminariu de Filoloxía Asturiana de la Universidá d’Uviéu col apoyu de la FICYT embaxo’l títulu “Llabor en Tienda: tendencies nueves na llingüística asturiana” y que va traer a Uviéu a investigadores como Patrick W. Zimmerman de la Universidá de Carnegie Mellos, en Pittsburg (USA), Roser Saurí i Colomer de la Universidá de Brandeis (USA), José Ramón Gómez Molina de la Universidá de Valencia, Pilar Perea i Sabater de la Universitat de Barcelona, Inés Fernández-Ordoñez de l’Autónoma de Madrid o Evaristo Ovide de la Universidá de Salamanca.

Según se desplica nel cartafueyu col programa que pue descargase dende Asturnews, “alredor de la llingua asturiana tán en marcha dientro la Universidá d’Uviéu y n’otres d’España y del estranxeru, proyectos d’investigación bramente novedosos qu’abren caminos metodolóxicos y llinies d’estudiu venceyaos a les corrientes más avanzaes de la llingüística europea y mundial, ensin escaecer disciplines averíes como la sociollingüística, la historia o’l derechu comparáu”.

“Llabor en Tienda: tendencies nueves na llingüística asturiana” quier ser un alcuentru científicu “onde los investigadores asoleyen ante la comunidá universitaria y públicu en xeneral los proyectos ya iniciatives nos qu’agora mesmo tán trabajando, llogrando asina un sanu intercambiu de conocencies y afalando a los futuros investigadores del fechu llingüísticu asturianu a escazar per nueves llinies de trabayu”.

Tesis y proyeutos

El llunes día 6 entamarán les Xornaes cola presentación a les diez de la mañana del proyectu AMPER de fonética y prosodia del asturianu, que presentara Carmen Muñiz Cachón de la Universidá d’Uviéu y a les 10,45 la desplicación de la investigación sobre Gramática Generativa de la llingua asturiana “Allugamientu de los pronotes n’asturianu y periferia izquierda sintáctica” que ta desenvolviendo Francisco Rubiera na Universidá de Georgetown. La mañana finará a les 12 cola presentación por Antonio Meilán de la Universidá d’Uviéu del “Proyectu Dámaso Alonso” sobre’l gallego-asturiano.

Los proyectos d’investigación llingüística nel ámbito lleonés van entamar la tarde, dende les 17 hores cola presentación d’Héctor García Gil, de la Universidá de Lleón, pa siguir a les 17,45 col proyeutu “Papel de los escritores nel procesu de recuperación del asturianu” que va presentar Xuan Santori Vázquez.

El restu del programa qu’inclúi tres dies más de presentaciones de tesis en desendolcu y proyeutos d’investigación va traer a Uviéu a investigadores como Patrick W. Zimmerman de la Universidá de Carnegie Mellos, en Pittsburg (USA), Roser Saurí i Colomer de la Universidá de Brandeis (USA), José Ramón Gómez Molina de la Universidá de Valencia, Pilar Perea i Sabater de la Universitat de Barcelona, Inés Fernández-Ordoñez de l’Autónoma de Madrid o Evaristo Ovide de la Universidá de Salamanca.

La Matrícula ye gratuita hasta’l día 6 d’ochobre y la inscripción pue facese empobinándose al profesor Xulio Viejo Fernández (Corréu electrónicu: jviejo@uniovi.es y eléfonu: 985.10.46.29)o al profesor Ramón de Andrés Díaz (Corréu electrónicu: randresd@uniovi.es y teléfonu: 985.10.46.46).