Les III Xornaes de Patrimoniu Cultural entamen n’Uviéu

Del 23 al 29 d’ochobre de 2017 nel Salón de Té del Teatru Campoamor van desenvolvese les III Xornaes de Patrimoniu Cultural d’Uviéu centraes esti añu nes víes históriques como La Plata o los Caminos de Santiago.

Nesta tercer edición les Xornaes de Patrimoniu Cultural d’Uviéu lleven por títulu “Uviéu, un patrimoniu a cuerpu de camín”. Esta definición nun ye casual. A lo llargo de la secular hestoria d’Uviéu, fueron munchos los caminos que tuvieron Uviéu como entamu, final o pasu, entendiendo’l términu camino na so máxima acepción: víes históriques como La Plata o los Caminos de Santiago; exes de crecedera urbana; los caminos de fierro producíos pol ferrocarril, o les siendes verdes qu’enllacen la urbe col mundu rural.

Toos estos caminos crearon paisaxes, conxuntos y patrimoniu. Espacios tan importantes como La Vega, vieyu monesteriu nacíu al amparu de los caminos xacobeos qu’anguaño ye un espaciu industrial y patrimonial llamáu a ser parte del futuru desenvolvimientu urbanu d’Uviéu; al traviés de les Miraes a La Vega vamos poder afayar les sos múltiples facetes. Industries y poblaciones obreres desenvueltes al amparu del ferrocarril, como ye’l casu de San Cloyo, que les sos ruines zarren una ayalga que nun podemos perder; o les siendes verdes que aúnan naturaleza, hestoria y patrimoniu dexando conocer la imprescindible zona rural d’Uviéu.

Enmarcaes dientro de les Xornaes Europees de Patrimoniu, col lema Patrimoniu y Naturaleza: un paisaxe de posibilidaes, les xornaes uvieines pretenden ser un focu d’alderique avera del presente y futuru del nuesu patrimoniu, una mirada actual y crítica sobro’l papel qu’hai de xugar na ordenación territorial uvieina.

PROGRAMA de les XORNAES DE PATRIMONIU CULTURAL