Les declaraciones de Casado sobro l’asturianu xeneren indignación na rede

La campaña #yofaloasturianu, que respuende a Pablo Casado tres les sos declaraciones contra l’asturianu d’ayeri, ta siendo sofitada pola sociedá civil asturiano, al mesmu tiempu qu’ instituciones como l’ALLA iniviten al presidente del PP a venir a conocer la realidá d’Asturies.

La campaña foi entamada precisamente por una de les asociaciones de defensa del idioma, Iniciativa pol Asturianu, que fixo un llamáu nes redes sociales y n’especial en Twitter pa responder al llider del PP, Pablo Casado, que nun discursu echó contra l’asturianu diciendo “que nun lo fala naide”.

El despropósitu del presidente del PP  rexistrose nun almuerzu informativu de la revista Nueva Economía que se celebró n’Almería y vino a cuenta de la propuesta de reconocer el vascu en La Rioxa y del tratu del PSOE a les llingües cooficiales. El presidente del PP censuraba que’l PSOE quiera oficializar “el bable que naide fala” n’Asturies, el catalán n’Aragón o que “Navarra sía euskaldun dafechu,”.

Iniciativa pol Asturianu pidió darréu a los usuarios de les redes que respondieran citando la cuenta de Casado (@pablocasado_) y la etiqueta o hagstag #yofaloasturianu xunto con dalguna fras n’asturianu. Dende la espublización d’esti llamáu sobre les ocho y media la tarde, les redes sociales fervieron con cientos de mensaxes d’apoyu al asturianu y a la oficialidá, recordándo-y a Casado la vitalidá d’esti idioma, con información, humor y tamién delles dosis de cabréu cola postura radical y agresiva del PP contra l’asturianu.

Yá va unes selmanes qu’Iniciativa pol Asturianu respondió a un ataque asemeyáu del PP d’Asturies contra l’asturianu, pente medies d’un videu respuesta que tuvo más de 100.000 visites nes diferentes redes onde se colgó:

https://www.facebook.com/171842412910385/posts/1998387880255820/

Pela so parte, l’Academia de la Llingua Asturiana univiaba esti miércoles pela mañana una carta del so presidente, Xosé Antón González Riaño, na qu’amás de retrucar en castellano la posición de Casado, incitábalu a desplazase a Asturies y visitar l’Academia pa conocer dafechu la realidá sociollingüística d’Asturies.