Portada Lliteratura L’Ateneú Obreru de Xixón recupera “La poesía lírica asturiana”, antoloxía de 1923

L’Ateneú Obreru de Xixón recupera “La poesía lírica asturiana”, antoloxía de 1923

by asturnet

El vieyu Teatru Xovellanos de Xixón, asitiáu na cai del mesmu nome, recibió’l 16 de febreru de 1923 la “Fiesta de la Poesía Asturiana”, una celebración del Atenéu Obreru d’El Llano, na que participaron poetes asturianos del momentu, dando llectura a testos propios y d’autores de tola hestoria lliteraria del país. Fabriciano González “Fabricio” abría l’actu col testu “El bable, alma de la poesía asturiana” y el Vizconde de Campo Grande facía a la fin del actu un discursu nel que s’empodera la bandera d’Asturies, colgada nesi actu de la fachada del teatru.

Esi mesmu añu, y col sofitu de la entós Diputación Provincial, l’Atenéu espublizó una antoloxía colos testos yá citaos y los poemes lleíos na Fiesta, con una parte pa los poetes n’asturianu y otra pa los poetes en castellán. Xuan María Acebal, Xosé Caveda y Nava, Teodoro Cuesta, Benito Canella, Marcos del Torniello, Carlos de la Concha, Pachu’l Peritu, Pachín de Melás, ente otros, conformen la parte escrita n’asturianu.

Güei xueves, dempués de más de 75 años de la espublización de la primer edición d’esta antoloxía, l’Atenéu Obreru de Xixón, vuelve a emprentar esta obra dientro de la colección Deva.

Na presentación, que va entamar a les ocho la tarde na sede del Atenéu, van participar, l’escritor y académicu de l’ALLA, Vicente García Oliva, Boni Ortiz, que va da-y llectura a dellos poemes y Balbina Meana, llicenciada en Filoloxía Hispánica y collaboradora na edición de la reedición.

Tamién te podria gustar