L’asturianu resuena en San Mamés más que n’El Molinón

La llingua asturiana foi esti domingu protagonista nel Nuevu San Mamés, tres del detalle que l’Athletic de Bilbao ufrió a los seguidores esportinguistes de La Mareona, a los que-yos dieron la bienvenida n’asturianu.

Notru exemplu de qu’hai más concencia llingüística y social de la llingua que falamos los asturianos lloñe de la nuesa tierra que n’Asturies, el Club Athletic de Bilbao saludó a La Mareona esportinguista esti domingu pela tarde con un recibimientu en llingua asturiana, dafechamente aplaudíu polos esportinguistes.

El detalle pa colos asturianos del Club bilbaín pon enrriba la mesa otra vuelta la falta de consideranza sobre la cuestión que tienen los clubs asturianos coles conocíes esceiciones d’equipos como L’Entregu, que camudó’l so nome al del topónimu asturianu correspondiente o’l Lealtad que nel 2015 camudar el nome del so campu pol que tradicionalmente tuviera, la denominación en llingua asturiana de “Les Caleyes”.

Dende que’l sábadu 5 d’avientu de 2015 tanto’l Real Sporting como’l Real Uviéu tuitearan mensaxes n’asturianu p’anunciar los partíos del domingu, nun hebo más aiciones significatives d’esti altor pa normalizar l’usu del asturianu nel futbol de los domingos.  “Mañana visítanos UDLP_Oficial nel Molinón. Col asturianu, xugamos nelmesmuequipu”, foi’l mensaxe del Sporting en twitter, mentantu deden l’Uviéu daben les bones nueches: “¡Bones nueches, uvieístes! Nada meyor qu’atopase en casa. Vémonos nel Tartiere (17h) ¡PUXA UVIÉU! ¡HALA UVIÉU!”.

Otros munchos equipos asturianos sumaranse a la iniciativa d’aquella, como facía la Unión Popular de Llangréu, el Real Avilés o el Lealtad.