L’asturianismu académico, lliterario, cultural y civil llora a Bolado

L’Academia de la Llingua Asturiana, al frente de munchos otros representantes del mundu académicu, lliterariu y cultural asturiano, amosaba’l so más fondu pesar y sentimientu ayeri y llamentaba tener que comunicar la muerte del miembru de númberu de la institución Xosé Bolado García.

Nuna nota de prensa, asoleyada na tarde d’esti xueves 20 de mayu, l’Academia de la Llingua Asturiana y tolos que formen parte d’ella asoleyaben la perda de “un compañeru col que siempre se podía cuntar, a un home comprometíu, cabal, atentu y cariñosu y, sobre manera, a un amigu lleal qu’enxamás escaeceremos. Sibi tibi terra levis”.

A l’Academia axuntábenese escritores, académicos, políticos, y homes y muyeres de la cultura asturiano en xeneral qu’asoleyaben el gran ciñu que siempre esperataba Bolado ente quienes lu conocíen y trataben.

Iniciativa pol Asturianu, por exemplu, espresaba’l so pesar pola muerte del escritor Xosé Bolado tamién nuna nota de prensa. La entidá quería reconocer el so compromisu llingüísticu col idioma qu’aplicó en toles xeres nes que tuvo relevancia y representación: “L’escritor, miembru de l’ALLA, sociu y collaborador d’Iniciativa pol Asturianu dexa un gran trabayu fechu nel so idioma, l’asturianu, que queremos reconocer y agradecer. Foi un colaborador dende los entamos de la nuesa organización y un entusiasta del idioma que con amabilidá y simpatía siempres defendió”.

Nacíu n’Uviéu en 1946 y vecín de Xixón, Xosé Bolado llicencióse en Filosofía y Lletres (Filoloxía Románica) na Universidá d’Uviéu, especializándose llueu n’estudios lliterarios. Profesor d’Enseñances Medies, desendolcaría’l so llabor profesional n’institutos d’Asturies y de Madrid, a onde se treslladó nos últimos años de la so carrera docente.

Venceyáu yá dende finales de los 70 del pasáu sieglu XX al modernu procesu de reivindicación de la llingua asturiana, Xosé Bolado foi nomáu académicu de númberu de l’ALLA nel añu 1988, faciéndose cargu dientro de la institución de temes rellacionaos cola so especialización profesional. El primer resultáu d’esta xera cuayaría na edición de la revista de creación lliteraria moderna Lliteratura. Revista lliteraria asturiana, de la que foi direutor dende 1990 hasta 2017. Xunto con ello, Xosé Bolado tuvo tamién al cargu, a lo llargo de munches ediciones, de l’asignatura de «Lliteratura Asturiana» ufiertada nos destremaos cursos y niveles de formación de l’Academia. Collaboró igualmente cola revista Lletres Asturianes y con distintes ponencies y comunicaciones presentaes nes Xornaes Internacionales d’Estudiu.

Poeta n’asturianu y en castellanu, antólogu y críticu lliterariu, déxanos una llarga y granible obra que destaca pol rigor, la precisión del análisis y el fondu conocimientu de los temes que trataba y estudiaba. Ente ello, ha sorrayase en primer llugar l’Antoloxía poética del Resurdimientu (1989), una esbilla de la obra de diez poetes de les dos primeres xeneraciones del Resurdimientu, como a él-y prestaba más llamar, en cuantes que consideraba que tola tradición lliteraria asturiana anterior xustificaba dafechu’l falar d’esi resurdir. Tamién, la edición d’Escritores en Llingua Asturiana (1992); el fascículu «Lliteratura asturiana contemporánea» de la Historia de Asturias de La Nueva España; los capítulos «El Surdimientu. La poesía» y «El Surdimientu. El teatru» de la Historia de la Lliteratura Asturiana; los poemarios Nomade (1991, n’italianu); Conxura contra la decadencia y Na estación de los relevos (2002 y 2006, n’asturianu); Línea imperceptible al temor (1988, en castellanu)… Estudiosu fondu de la obra de Rosario d’Acuña, entamaría a publicar la producción d’esta autora dende 1985 (El Padre Juan), asoleyando en 2007 la edición d’Obras reunidas.

A esti llabor, curtiamente reseñáu equí, hai qu’amestar la presidencia del Atenéu Obreru de Xixón onde, amás de coordinar munches actividaes, conferencies, esposiciones, etc., Xosé Bolado fundaría la coleición poética «Deva».

Uviéu, 20 de mayu de 2021