L’Arribada pon en marchar un nuevu gallardón, el Premiu Timón de Cultura Asturiana

Ya ta abierta la convocatoria del primer Premiu Timón de Cultura Asturiana destináu a asociaciones, sociedaes y fundaciones con llar n’Asturies, que tengan como fin la conservación, promoción y dignificación de la identidá cultural del país, considerándose un méritu importante la difusión de la llingua asturiana y/o del gallego-asturianu nes sos actividaes.

Les candidatures puen ser presentaes por una persona o un colectivu nes señes de corréu electrónicu de l’asociación:larribada@gmail.com. El plazu de presentación de candidatures zarrará’l día 2 de mayu de 2013 a les 12 hores.

Esti premiu xúnese a los Premios Timón a la trayectoria lliteraria de los escritores d’Asturies, convocaos el 21 de payares pasáu; el VII Premiu Timón, p’autores en llingua asturiana y n’eonaviego, y el IV Premio Timón, p’autores asturianos en llingua castellana. P’alcordar los gallardones l’asociación convocará a xuraos, ún por cada modalidá, formaos por persones venceyaes al ámbitu cultural asturianu. Estes distinciones, consistentes nuna obra del escultor y ceramista xixonés Jesus Castañón pa cada premiu, entregaránse mientres la celebración de La Vagamar 2012.

Los ganadores anteriores fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011) y Antón García (2012); y del Premio Timón, Luis Fernández Roces (2010), Juan Méjica (2011) y Fernando Menéndez (2012).