Portada Comunicación L’ALLA denuncia la inseguranza xurídica nel exerciciu de derechos llingüísticos y sorraya la necesidá d’oficialidá

L’ALLA denuncia la inseguranza xurídica nel exerciciu de derechos llingüísticos y sorraya la necesidá d’oficialidá

by redacción asturnews
Academia de la Llingua Asturiana

L’Academia de la Llingua Asturiana (ALLA) vieno acabante espublizar esti día una nota de prensa cola que quier espresar públicamente la so esmolición poles torgues qu’un vecín de La Felguera, Xicu Ilesies, ta topando pa rexistrar formalmente’l nome y los apellíos nes sos formes asturianes, conforme a la previsión llegal.

Esti procedimientu, cenciellu y normalizáu, nun alcuentra davezu problema nengún nel so desendolcu, qu’entama col certificáu d’equivalencia de l’ALLA y remata cola actualización de los datos nel Rexistru Civil y nel DNI.

El casu de Xicu Ilesies refiértanos, llamentablemente, l’estáu d’inseguranza xurídica que la población asturianofalante vive nel exerciciu de los derechos llingüísticos. La situación particular del asturianu na llegalidá vixente fai que, dacuando, los intereses llexítimos de la población choquen cola voluntá, la disponibilidá o l’enclín ideolóxicu del funcionariáu. Esto supón una circunstancia que reduz les llibertaes llingüístiques y france los principios d’igualdá que rixen nuna sociedá democrática.

Poro, l’Academia de la Llingua Asturiana quier:

– Sofitar al ciudadanu afeutáu por esti agraviu y animar a que toles persones que s’atopen en situaciones asemeyaes busquen la so proteición en materia de derechos llingüísticos.

– Desixir a la instancia competente qu’actúe ensin pilancos y conforme a les normes que regulen el procedimientu d’adautación al asturianu del nome y los apellíos, y a les instituciones que tean al cuidu d’esta, que vixilen la so actuación.

– Denunciar espresamente los problemes que xenera la falta d’homologación llegal del asturianu y pidir a tol espectru políticu que trabaye na reconocencia total de los derechos llingüísticos al traviés de la única ferramienta precisa: la oficialidá.

Tamién te podria gustar