L’agrupación de Siero d’Andecha Astur ve surrealista la propuesta de la Xunta Toponimia.

Nun comunicáu fechu pola agrupación de Siero d’Andecha Astur, el grupu nacionalista afita’l llabor de normativización y los criterios d’autoridá llingüística de l’Academia de la Llingua, considerando que “tien que ser esta institución la qu’afite los topónimos del nuesu Conceyu y non la Xunta de Toponimia qu’entendemos como una ferramienta de llaváu de cara d’IU, tres la renuncia a la oficialidá nos sos pautos de gobiernu col PSOE, que ye dafechu inecesaria y que pa nós busca quitái competencies y erosionar a l’ALLA polos sos irrenunciables posicionamientos a favor de la oficialidá de la Llingua Asturiana y de defensa de los drechos llingüísticos de los asturianos y asturianes”. L’agrupación de Siero considera que la propuesta toponímica de l’Academia de la Llingua Asturiana, recoyida nel llibru “Nomes de Conceyos, Parroquies y Llugares del Principáu d’Asturies” no tocante a la toponimia de Siero el llibru de referencia nel que s’inxerten los topónimos a oficializar.
Andecha Astur considera pergrave que se propongan nomes billingües pa oficializar, como Lugones-Llugones. Andecha camienta que “surrealistes estes pretendíes denominaciones billingües y nun-yos encontramos más sentíu que’l de tapecer la denominación tradicional”
Pa finar Andecha Astur diz que la Xunta de Toponimia, coles sos propuestes “a la escontra de les resoluciones académiques de la institución “a la que-y correspuenden les competencies normativizadores, namás trai confusión ente la población, dificulta la normalización social de la Llingua Asturiana y desprestixa’l gran llabor de l’Academia , ya incluso la propia llingua, énte la ciudadanía”

L’Academia de la Llingua Asturiana tamién amuesó la so perplexidá énte la propuesta de la Xunta de Toponimia sobre les denominaciones de les parroquies y llugares del conceyu de Siero.