L’Academia fai homenaxe a Ana Cano y presenta Llingua, tierra, nomes…

Nun cenciellu actu, nel que se va presentar una monografía d’onomástica románica y que se va celebrar nel Aula Magna del Edificiu Históricu de la Universidá d’Uviéu, l’Academia de la Llingua Asturiana quier facer homenaxe a l’académica y catedrática emérita Ana María Cano González.

El volume Llingua, tierra, nomes… Estudios d’Onomástica Románica (1987-2017), que s’asoleya con motivu d’esta reconocencia, axunta la xera investigadora de Cano nun terrén onde tien collechao bona parte de la so producción. Ello sedrá mañana vienres, a les 12, con  midíes  COVID  y  una  entrada  reducida  a  la  que  namás  van  tener  accesu  les persones con invitación confirmada. L’actu, sicasí, va poder siguise en direuto pela canal de Youtube de la Universidá d’Uviéu,  gracies  al  so  Serviciu d’Audiovisuales

La que fora presidenta de l’Academia ente 2001 y 2017, caltién güei importantes responsabilidaes  na  vida  académica.  Ye’l casu de la direición de les Xornaes Internacionales d’Estudiu y de la revista Lletres Asturianes, dos de les actividaes de mayor percorríu, dambes empobinaes a la cientificación y la internacionalización  de  l’asturianística.  Amás,  Cano  encárgase  güei  de la
representación  de l’ALLA  nel Real Institutu d’Estudios Asturianos y na Xunta Asesora de Toponimia del Principáu d’Asturies,  de  la  estaya  lexicográfica  de  la Institución  y,  en  xeneral,  de  la  supervisión  de  la  obra  investigadora  que  bien  de científiques  y  científicos  desendolquen  y  asoleyen  na  Academia  de  la  Llingua Asturiana.

Miembru de númberu dende l’aniciu de la Institución, Cano foi responsable a lo llargo  de  munchos  años  del  programa  formativu  de  l’ALLA,  formó  parte  de  les comisiones  redautores  de  les  Normes  ortográfiques,  de  la  Gramática  o  del Diccionariu y tamién desendolcó otres funciones  na xunta de gobiernu, como la d’ayalguera.  El  so  trabayu  rigorosu,  la  so  implicación  personal  y  capacidá d’interllocución y el so espíritu d’equipu siempre tuvieron y tán al serviciu de la proyeición internacional, el prestixu y el dinamismu d’una llingua recuperada, en bona midida, gracies al facer de la profesora, científica y académica somedana.