La XXXV Selmana de les Lletres celebrase en Peñes con Llingua, tastos autóctonos y “recetes solidaries”

La XXXV Selmana de les Lletres entama a celebrase na Mancomunidá del Cabu Peñes esti miércoles 7 de mayu con delles actividaes como la esposición que s’inaugura güei. Del 7 de mayu al 2 de xunu nel Centru Polivalente “La Baragaña” de Candás” veráse esta esposición de les campañes gastronómiques sacaes nestos años dende’l SNL. Y la esposición completaráse col concursu “Iguando’l mundu”, una esbilla de “recetes Solidaries”.

Nel concursu, puen participar (del 9 de mayu al 27 de xunu), con namás un testu, toles persones mayores de 16 años mandando la so receta solidaria al corréu electrónicu del Serviciu de Normalización Llingüística, xardu@hotmail.com. o nes mesmes oficines del Serviciu.

Los testos han ser “recetes solidaries”, non recetes gastronómiques, esto ye, recetes pa facer d’esti mundu, un mundu meyor, más solidariu. Puen ser recetes contra’l racismu, la violencia de xéneru, la xenofobia… Pa más información pue consultasee’l facebook del SNL.

Ye mui importante que les persones que nun quixeren que’l so nome figurare nos trabayos que se vaigan publicar, indíquenlo na mesma fueya cola referencia: “nun espublizar datos personales”, nel casu contrariu, apaecerá’l trabayu y el nome y, apellíos del autor o autora.

Un exemplu de receta solidaria podría llevar como ingredientes: una persona (nun importa’l tamañu, color, pesu … ), un pucuñín de voluntá, una plizquina tiempu, y delles cuyaraes d’empatla. Y como mou preparación: gárrase la persona y quitámos-y tou restu d’apatía, desdexu y egoísmu. Adobámosla bien col pucuñín voluntá y les cuyaraes d’ernpatía, dexándola reposar una plizquina tiempu nun ambiente afayadizu y prestosu. En viendo que cuaya, sacárnosla al mundu y compartímosla coles persones convidaes. Esti platu nun tien caducidá.

Nel Centru Polivalente “La Baragaña” de Candás” veránse dientro la esposición de les campañes gastronómiques sacaes nestos años dende’l SNL les que vienen darréu: “Peñes, navegando ente cazueles” (Caldereta y calderada”, “Fariñón y fariñona”, “Marañueles d’El Cabu Peñes, dulces alcordances”,“La sidra, d’Asturies” y “Que nun t’esmigaye’l pan”.

Facebook del SNL de Cabu Peñes