La Xunta pola Defensa de la Llingua vuelve a pidir la oficialidá del asturianu pa la reforma del Estatutu

Redacción.

La Xunta Pola Defensa de la Llingua Asturiana (XPDLA) fizo ayeri un llamáu a “tolos sectores democráticos pa que tean preparaos pa movilizase en cuantes entamen los trabayos de reforma del Estatutu d’Autonomía”. La XPDLA espresó la so intención de lluchar “democráticamente” porque’l nuevu testu que s’apruebe recueya la oficialidá de la llingua asturiana, porque “un estatutu ensin oficialidá ye un esatutu antidemocráticu y represor y eso nun ye bono p’Asturies nin pa los asturianos”.

La Xunta respondió a les declaraciones del conseyeru d’Educación, Jose Luis Riopedre, sobre les negociaciones pa la ellaboración del nuevu Estatutu, y a la posibilidá d’incluyir la oficialidá del asturianu nel mesmu, dalgo que’l responsable autonómicu refuga.

La Xunta recordó al conseyeru y a la Federación Socialista Asturiana, que “tienen d’escoyer ente les llibertaes o la represión”, “Riopedre tien d’escoyer ente reprimir a los que piden drechos o dar llibertaes pa qu’use l’asturianu quien quiera. Cola primer opción unos sufren discriminación; cola segunda, toos tienen derechos llegales”, señaló’l comunicáu.

La Xunta refugó de la mesma manera l’argumentación del responsable autónomicu, cuando señaló que “cuando se negocia naide tien de quedar como vencedor o vencíu”. Los defensores del asturianu entrugáronse a esti respectu: “¿Cómo quier que se sienta’l ciudadanu que quier usar l’asturianu y l’alministración lu niega porque nun ye oficial?”.