La XDLA pide responsabilidá política pa sacar alantre la reforma l’Estatutu

La Xunta pola Defensa de la Llingua Asturiana pide responsabilidá a los partíos políticos pa sacar alantre una reforma del Estatutu qu’acabe d’una vez cola marxinación llingüística, ensin exericios d’audacia estrema, pero ensin aplazamientos.

Esta llexislatura, de la que yá pasó un terciu si llega a completar los cuatro años, nun pue convertise n’otra llexislatura fallida. Pala organización de defensa dela llingua “ye’l momentu de la responsabilidá. Yá tuvo bien d’aplazamientos y del “agora nun toca”. El movimientu de reivindicación llingüística lleva cuarenta años lluchando y bona parte d’ellos fíxolo con unos apoyos parllamentarios muncho más desfavorables”.

Nuna nota de prensa asoleyada esti día, la XDLA fai alcordanza de que “nun ye menester nengún exerciciu d’audacia estrema. Lo qu’hai que facer agora n’Asturies fíxose yá va cuatro décades, recién salíos d’una dictadura, nes demás comunidaes autónomes con una llingua propia diferente del castellanu: Galicia, País Vascu, Navarra, Cataluña, Valencia y Baleares. La evolución nesti tiempu de cualquiera d’eses comunidaes en comparanza cola d’Asturies fala ella sola. Ye’l momentu de cambiar lo que ta claro que nun funcionó. Porque del pozu nun vamos salir cavando hacia abaxo”.

La Xunta pide “a tolos grupos parllamentarios un exerciciu de responsabilidá mínima: que dexen de llau los cálculos partidarios y l’enfrentamientu sectariu, y se pongan a trabayar nuna reforma estatutaria que nun pue esperar más. Al PSOE correspuénde-y la iniciativa, por ser el partíu del Gobiernu y amás tener l’únicu grupu parllamentariu col númberu necesariu d’escaños pa entamar un procesu de reforma. A los demás partíos correspuende apurrir propuestes y votos pa llevar esta reforma a bon fin”.

Nesi sen, la Xunta diz aplaudir “cualquier iniciativa política que ponga enriba la mesa la urxencia d’una reforma estatutaria. Ye’l momentu de saber si tamos énte la nueva política, o si tamos asistiendo a la vieya representación de siempre con actores más mozos”.