La XDLA denuncia que’l Parador de Courias nun usa la toponimia oficial

La Xunta pola Defensa de la Llingua Asturiana vien de contactar, delles selmanes atrás, col Ente Paradores de Turismo de España S. A. pa que se rectifique l’enquivocu alvertíu na denominación del parador de Courias, que se va abrir d’equí a poco nel conceyu de Cangas del Narcea. Al nun tener respuesta de momentu, espliquen dende la organización “vémonos nel imperativu de facer públicu’l fechu y d’informar a toles alministraciones implicaes na interpretación recta de la llexislación vixente”.

Y ye que’l nome oficialmente reconocíu del llugar onde ta’l monesteriu que va facer les funciones de parador ye Courias (y non *Corias, como recueye la páxina web del Ente).

Recuerden que la denomación oficial ta afitada dende setiembre del 2008, nel decretu 89/2008 del Boletín Oficial del Principáu d’Asturies que recueye los nomes tradicionales del conceyu de Cangas de Narcea como los únicos válidos.

De la mesma manera, a nivel estatal, l’Institutu Nacional d’Estadistica encargáu del nomenclátor toponímicu yá fai constar na so documentación les denominaciones recoyíes nel BOPA.

Por tolo anterior, soliciten a Paradores de Turismo de España que rectifique l’erru y dea cumplimientu a la toponimia oficial asturiana. De la mesma manera, la Xunta insta a la Dirección Xeneral de Política Llingüística y al Conceyu de Cangas del Narcea a infomar con urxencia al Ente de Paradores sobre’l cumplimientu inescusable de la llexislación vixente.