Portada Sociedá La XDLA convoca otra Acción #OFICIALIDÁ esti 21 na RTPA

La XDLA convoca otra Acción #OFICIALIDÁ esti 21 na RTPA

by asturnet

Dientro de la so convocatoria Acción: #OFICIALIDÁ con toles lletres qu’entamara’l pasáu mes de xineru, la Xunta pola Defensa de la Llingua Asturiana fai un llamamientu pa una nueva acción reivindicativa esti sábadu 21 de febreru delantre de les instalaciones de la RTPA en Xixón. Coincidiendo col Día Internacional de la Llingua Materna, na XDLA quieren “facer visible’l papel marxinal que da la televisión pública asturiana al asturianu, funcionando como una ferramienta más de sustitución llingüística en cuenta de ser un mecanismu fundamental na tresmisión interxeneracional del idioma”.

Sigún la convocatoria de la Xunta Pola, ” la comunidá asturfalante tien derechu reconocíu na llexislación y trataos internacionales a disponer de servicios culturales y medios de comunicación qu’usen de manera vehicular la llingua asturiana”.

Por eso esti sábadu 21, acompañaos de personaxes de la televisión, van dicir claro que queremos una televisión n’asturianu.

La Xunta pola Defensa de la Llingua Asturiana entamó esti tipu d’acción reivindicativa urxente’l llunes 2 de febreru a les 11,30 hores, delantre de la Conseyería d’Educación y la Delegación del Gobiernu na Plaza d’España d’Uviéu. Aquella convocatoria fízose depues de que nes últimes selmanes Ministeriu y Conseyería d’Educación volvieran a enredase y torgaran otra vuelta los derechos d’estudiantes y profesores al negase la creación de la especialidá docente de Llingua Asturiana.

Tamién te podria gustar