La XDLA convoca la manifestación del Día de les Lletres cola toponimia y los medios de comunicación como referentes

Esti llunes, día 5 de mayu, a les 16 hores presentábase nel Conceyu Abiertu de la Cai La Gascona d’Uviéu la manifestación qu’esti vienres 9 de mayu entama como cada añu la Xunta pola Defensa de la Llingua Asturiana. Una manifestación que nesti 2014 tien por lema «L’asturianu Llingua Oficial». La marcha va salir a les 19:30 de la Estación del Norte d’Uviéu y finará como davezu delantre del Teatru Campoamor onde nesi momentu entamará la Xunta Estraordinaria de l’Academia de la Llingua Asturiana.

Na rueda prensa informose esta tarde sobre esti y otros actos que tien entamaos l’asociación a lo llargo de la selmana, como’l que se fadrá mañana martes pa celebrar los 30 años de presencia de la llingua nel sistema educativu, y valorose la situación actual de la política llingüística.

Nesti sen, la manifestación va tener esti vienres, nel comunicáu que se llee davezu al finar la mesma, un alcuerdu pa col “frenu” al procesu de recuperación de la toponimia tradicional que se ta amosando nestos caberos años y al perpequeñu usu del idioma nos medios de comunicación públicos, incumpliendo les lleis.

Carlos Pulgar y María Xosé Martíneza adelantraron esta información en nome de la Xunta Pola na rueda prensa de presentación la manifestación, que va tener llugar esti vienres, 9 de mayu, a partir de les 19.30 hores y que saldrá dende la Estación de Renfe n’Uviéu pa finar nel Teatru Campoamor.

Amás de desixir que s’igue la toponimia de los 28 conceyos que tovía nun aprobaron la revisión toponímica, la Xunta va criticar l’usu de la llingua asturiana nos medios de comunicación públicos, que “nun pasa d’un 2% o 3% marxinal”, sigún dixo Pulgar.