La web de XEGA, finalista del premiu ‘T-incluye’ dirixíu a favorecer la integración

La web de XEGA (Xente Gai Astur) resultó seleicionada pa participar na fase final del premiu ‘T-incluye’, un proyeutu apoyáu dende’l Ministeriu d’Industria y el Gobiernu del Principáu d’Asturies cola idea de reconocer el trabayu de les páxines inclusives.

En total presentáronse un total de 77 propuestes de les que fueron seleicionaes 20 finalistes, con un xuráu formáu por Ana González, del Institutu Asturianu de la Muyer; Isabel Carrera, coordinadora del Máster y Doctoráu de Xéneru y Diversidá de la Universidá d’Uviéu; Laura Viñuela, xerente d’Espora Consultoría de Xéneru; Teresa Meana, feminista y profesora de la Enseñanza Secundaria, esperta en llingua non sexista y Yolanda Lorenzo de la Fundación CTIC.

El proyeutu busca promocionar l’usu de la llingua non sexista na rede con delles estratexes pa fomentalu. Pa ello analiza los testos existentes, la iconografía utilizada, la rotura d’estereotipos, la presencia d’orixen asturianu y otres de Cantabria, Andalucía, Canaries, Madrid, etc…

Nel certame existen cuatro categoríes diferentes: web pública más inclusiva, web empresarial más inclusiva, entidaes ensin ánimu d’arriquecimientu más inclusives y webs personales inclusives. XEGA ta nomada pal premiu de la tercer categoría xunto coles páxines de Muyer y Deportes, la Fundación Isomía pa la Igualdá d’Oportunidaes de Castellón, la Fundación Mental d’Asturies y la web sieres.org de la Fundación Tomillo. XEGA espresó al traviés d’un comunicáu sentir una gran allegría pola noticia de que la so páxina web destaca “en valores d’inclusión porque esi ye’l so oxetivu”.