La Selmana de les Lletres empieza cola proyección en Grao del DVD “Cinco poemes”

La presentación y proyección del DVD “Cinco poemes” nel Aula de les Metáfores de Grao y una mesa redonda nel mesmu sitiu na que participen Taresa Lorences, Huggo O’Donnell, Xabel Vegas y Ana Vanessa Gutiérrez, va ser el primeru de los actos públicos de la XXVI Selmana de les Lletres Asturianes. Embaxo’l lema “Poesía en movimientu” la Conseyería de Cultura quier reconocer esti añu el llabor creativu de los poetes contemporáneos en llingua asturiana. El DVD “Cinco poemes” ye una tarxeta de visita de la obra desenvuelta por estos autores dende’l Surdimientu hasta la data actual.

L’Aula de les Metáfores de Grao ye l’escenariu escoyíu pola Conseyería de Cultura pa dar empiezu a los actos de les Lletres. Nesti espaciu dedicáu a la difusión de la poesía que coordina Leopoldo Sánchez Torre va proyectase per primer vez en públicu el DVD “Cinco poemes”. Concebíu col formatu d’una miniserie de televisión caún de los cinco cortometraxes incluíos nél recrea el poema d’un autor, nuna esperiencia de colaboración creativa ensin precedentes na nuestra llingua y qu’ufierta una doble visión del trabayu que desenvuelven una parte de los escritores actuales de poesía y una parte de los realizadores cinematográficos n’Asturies. En “Cinco poemes” Sergio Sánchez visualiza’l poema “La muerte” de Roberto González Quevedo; Ramon Lluis Bande filma los versos de “Paniceiros” de Xuan Bello;José Braña acomete “La casa” de Berta Piñán; Jorge Rivero recrea el poema “Ente nós” d’Ana Vanessa Gutierrez; finalmente Llucía Herrera y Xuan Lluis Ruíz dan imáxenes a “El balagar” de Pablo Antón Marín Estrada.

Los cortometraxes que se presenten esti viernes 29 en Grao van dir proyectándose nes desconexones diaries del centru territorial de RTVE n’Asturies a lo llargo de la prósima selmana y el sábadu 7 podrán vese toos xuntos, talo aparecen nel DVD. A lo llargo de la Selmana les Lletres les emisores de radio emitirán un audio con poemes d’otros autores contemporáneos en llingua asturiana, que tamién apaez editáu dientro’l DVD “Cinco poemes”.

L’actu de presentación de los cortometraxes de José Braña, Sergio Sánchez, Ramón Lluis Bande, Jorge Rivero y Llucía Herrera-Xuan Lluis Ruíz y la mesa redonda que va siguir a la proyección, moderada por Leopoldo Sánchez Torre y na que participen el pintor Huggo O’Donnell, les escritores Taresa Lorences y Ana Vanessa Gutiérrez, xunta’l músicu Xabel Vegas, ta programáu pa les 19.30 na Casa la Cultura de Grao.