Portada Lliteratura La revista lliteraria Formientu va presentar güei un númberu especial de narrativa

La revista lliteraria Formientu va presentar güei un númberu especial de narrativa

by asturnet

Redacción.

Güei miercoles a les 13:00 hores nel Salón d’actos de la Biblioteca del Campus del Milán (Uvieu), l’asociación H.a Xareos, editora de la revista de lliteratura moza Formientu va presentar el segundu numberu de la revista, un especial de narrativa “colo meyor que dan de si les lletres más moces”.

La revista va presentase dientro de los actos oficiales de la XXVIII Selmana de les Lletres Asturianes, dedicada esti añu a la narrativa y va cuntar cola presencia de Ramón d’Andres (Xefe de Política Llingüística del Principáu d’Asturies), Xulio Viejo (Profesor titular de la Universidá d’Uvieu) y el direutor de la publicación, Inaciu Galán y González, escritor y presentador del espaciu ‘Xente de casa’ na TPA.

La revista ñació l’añu pasáu “cola idea d’espublizar a los autores más mozos que taba dando de sí la lliteratura asturiana” y esti segundu númberu faise coincidiendo cola Selmana de les Lletres con un formatu especial. Cuasi 150 páxines onde apaecen cerca d’una ventena d’autores. La revista tien un prólogu institucional de Ramón d’Andres, otru del so direutor, Inaciu Galán y completase colos cuentos y biografíes de los autores y un álbum de fotos de presentaciones anteriores.

Los autores qu’apaecen son: Ricardo Candás, Pablo Texón, Jose Ángel, Pablo Rodríguez Medina, Jorge Fernández García, Hector Perez Iglesias, Xabel Llano, Pablo Rodríguez Alonso, Elizabeth Felgueroso, Pablo X. Suárez, Iris Díaz, Diego Aldebarán, Xabel de Cea Gutierrez, Xaime Menendiz Llope, Sergio Gutierrez Camblor, Benxa Perez, Inaciu Galán y González, Nicolás V. Bardio y Mino Álvarez.

Próximes presentaciones de Formientu:

MIÉRCOLES 2 DE MAYU

● 13:00 hores │ Salón d’actos de la Biblioteca del Campus del Milán (Uvieu)

XUEVES 3 DE MAYU

● 13:00 hores │ Carpa de Les Meanes (Aviles)

MARTES 8 DE MAYU

● 20:00 hores │ Salón d’actos de La Pola Siero

MIÉRCOLES 9 DE MAYU

● 18:30 hores │ Casa de la Xuventú de Sotrondio (Samartín del Rei Aurelio)

VIENRES 18 DE MAYU

● 19:00 hores │ Salón d’actos de la Casa la Cultura “Teodoro Cuesta” (Mieres)

Tamién te podria gustar