La revista Formientu presenta güei una entrega nueva na Xunta d’Escritores Asturianos

La revista Formientu, asoleyada por Xareos! Xestión Cultural y la editorial La Cruz de Grau, va presentar el númberu 6 de la so trayectoría, qu’entamó en 2007 y que busca espublizar la obra de los autores más mozos de la lliteratura asturiana y dala a conocer. L’actu va celebrase güei martes nel palaciu Villa Madalena d’Uviéu, a partir de les 19:30 hores cola presencia de los autores qu’apaecen nesti númberu, la dirección y l’editor de la mesma.

Nesti númberu seis apaecen autores avezaos de la revista, amás de delles novedaes, como ye’l casu d’Abel Martínez, Daniel Estrada, Llucía Di Salvo León, fía d’emigrantes asturianos en Bonos Aires, y Manuel Fernández García, qu’escribe a comuña col so hermanu Jorge, habitual de Formientu. Amás de Javier Cayado Valdés, Benxa Pérez, Héctor Pérez Iglesias, Fran Melero «Frantxu» y Ricardo Candás.

Súmense tamién a la edición los rellatos ganadores del I Certame de Microrrellatos Mozos «FORMIENTU», que convocaron esti añu Xareos! y la editorial La Cruz de Grau col envís d’afalar “la creación lliteraria y ayudalos a afondar nes sos posibilidaes creatives”. A los rellatos que llevaron premiu o accésit, súmense los escoyíos pol xuráu pa la so espublización.

Los ganadores van recibir un premiu y diploma acreitativu nun actu que va celebrase al empar d’esta presentación del númberu 6, en Villa Madalena. Nel mesmu va facese un recital, a partir de les 20 hores, nel que van participar: Pablo X. Suárez, Alejandra Sirvent, Abel Martínez, Frantxu Melero, Rubén Rey y Jorge Fernández García.

Formientu ta dirixida por Inaciu Galán y el so Conseyu de Redacción ta formáu pol escritor Benxa Pérez y l’editor César García, coordinaos pola escritora y filóloga Laura Marcos.