La pancarta de la campaña #quelaponganelbalcón aporta a la Casa Conceyu de Grau

Esti xueves 26 de mayu, militantes de la Xunta pola Defensa de la Llingua Asturiana y miembros de la corporación moscona, punxeron la pancarta de Conceyos pola Oficialidá na Casa Conceyu de Grau. La inciativa ta inxerta dientro de la campaña #quelaponganelbalcón y nunos díes la pancarta va marchar a otra Casa Conceyu.

La selmana pasada la pancarta de “Conceyos pola Oficialidá”, la iniciativa de la Xunta pola Defensa de la Llingua Asturiana que, xunto al conceyu de Bimenes, busca visibilizar el compromisu del más d’un cientu de cargos municipales cola reivindicación de la oficialidá del asturianu y del gallego-asturianu, tuvo puesta nel corredor de la Casa Conceyu de Bimenes, en Martimporra y darréu d’ello r n’El Parche d’Avilés, delantre de la Casa Conceyu.

Que la oficialidá nun ye un oxetivu partidista nin localista nin elitista demuéstralo’l fechu de que la iniciativa “Conceyos pola Oficialidá” cuenta yá con más d’un cientu de conceyales de cuasi la metá de los conceyos d’Asturies, que fueron escoyíos nes pasaes elecciones municipales dientro de candidatures qu’algamaron en xunto más de 130.000 votos d’electores d’Asturies, y ente los que s’alcuentren persones de cuasi toles formaciones polítiques, incluída la de la propia alcaldesa d’Avilés.