La OSPA estrena n’Avilés el so conciertu ‘Fantasía Española’

Esti xueves 1 de payares nel auditoriu de la Casa de Cultura a les 20.15 hores, la Orquesta Sinfónica del Principáu d’Asturies, dirixida por Rossen Milanov y con Iagoba Fanto como solista al violonchelu, recupera una de les obres de la compositora asturiana María Teresa Prieto.

Música n’Escena torna en payares y vuelve averar a Avilés a la Orquesta Sinfónica del Principáu d’Asturies (OSPA), un clásicu dientro del ciclu de escenAvilés. La OSPA estrena na ciudá’l conciertu ‘Fantasía Española’, nel que va ufiertar pieces clásiques del repertoriu español, lo mesmo que de compositores foranos qu’homenaxaron a la cultura española. Va Ser el xueves 1 de payares, a les 20.15 hores nel Auditoriu de la Casa de Cultura. Les entraes pueden adquirise nos calces habituales, les taquilles de la Casa de Cultura y vía telemática en https://entraes.liberbank.es/palaciovaldes, a un preciu de 18 euros.

So la batuta del so director titular, Rossen Milanov, y con Iagoba Fanlo como solista al violonchelu, van repasar dalgunes de les pieces más conocíes del fascinante repertoriu de la música clásica de raigañu español. Dende Manuel de Falla, cola suite de “L’Amor Bruxu”, a los “Chants d’Espagne” de Isaac Albéniz y Richard Rijnvos, que van interpretar per primer vegada nel so repertoriu, pasando por Maurice Ravel y el so “Pavana para una infanta difunta”.

Coles mesmes, tamién per primer vegada na so trayectoria, la Orquesta Sinfónica del Principáu d’Asturies, de la mano de Iagoba Fanlo, recupera una de les pieces más representatives de la compositora asturiana María Teresa Prieto, “Sonata Modal para violonchelu y orquesta”. Prieto, perteneciente a la xeneración de compositores del 27, a los que Iagoba Fanlo estudió en fondura y arrexuntáu, y exiliada en México al empiezu de la Guerra Civil, escribió esta obra en 1960, y nunca s’estrenó mientres vivió.

Programa “Fantasía Española”

L’amor bruxu: suite. Manuel de Falla.
Conciertu para violonchelu. María Teresa Prieto.
Pavana para una infanta difunta. Maurice Ravel.
Chants d’Espagne. Isaac Albéniz y Richard Rijnvos.