La Oihaneder Euskararen Etxea de Vitoria-Gasteiz dedica dos xornaes a la llingua asturiana

 Esti miércoles 20 de xineru, de magar les 19 hores, entamen les xornaes que la Oihaneder Euskararen Etxea de Vitoria-Gasteiz va dedicar al asturianu, dientro del ciclu dedicáu a llingües minorizaes que tienen en marcha nesti espaciu de difusión de la cultura n’euskera, abiertu a la presencia d’otres cultures y llingües.

Inaciu Galán, periodista y presidente d’Iniciativa pol Asturianu, va ufrir una charra sobre’l trabayu de la organización, la situación del asturianu y otres cuestiones venceyaes al tema. Amás, van participar nesta actividá de la la Oihaneder Euskararen Etxea de Vitoria-Gasteiz  con delles charres más, Ánxel del Río, representante de la Xunta pola Defensa de la Llingua Asturiana, y Xulio Viejo, como filólogu y profesor de la Universidá d’Uviéu.

Xuntos, van responder a les entrugues del públicu alredor del momentu que vive l’asturianu, y van intentar facer un averamientu básicu a la llingua asturiana, con un cursín exprés. Al otru día, el xueves 21, el grupu folk asturianu Corzobeyos, va dar un conciertu nel mesmu espaciu y como pieslle d’estes xornaes dedicaes a la llingua asturiana.

Iniciativa pol Asturianu va participar d’estes xornaes y llevar la situación del asturianu al País Vascu, “onde pese a la cercanía xeográfica nun ye mui conocida la situación sociollingüística d’Asturies” sigún comenten na nota de prensa na que daben anuncia a la collaboración. Los actos son abiertos al públicu y convidaen a toles persones interesaes na cuestión a averase per esti espaciu na tarde del miércoles y el xueves.