La llingua tará presente na Feria FEMEX de Samartín del Rei Aureliu

La Feria de Muestres y Esposiciones que se celebra esti fin de selmana en Samartín va dedicar un espaciu a informar sobre les actividaes d’esti serviciu y pa esponer parte del trabayu que lleva faciendo a lo llargo de los sos 8 años d’esistencia. Amás d’esto, quier ser un puntu d’información pa toes aquelles persones (empresarios, miembros d’asociaciones, personal docente…) a les que-yos pudiera resultar útil el trabayu que se desendolca dende esti serviciu.

Esti próximu fin de selmana, dende’l vienres 6 al llunes 9 de setiembre celébrase en Samartín la 23 edición de la Feria de Muestres y Esposiciones FEMEX nel recintu del parque d’El Florán. Esta actividá ta entamada pol Ayuntamientu de Samartín del Rei Aurelio, la Conseyería d’Economía y Emplegu, la Cámara de Comerciu d’Uviéu y Cajastur. El recintu ferial va tar formáu por 52 espositores nos que van tar representaos diversos sectores como l’alimentación, los servicios, la moda, el calzáu, los complementos, los muebles, la decoración o l’automoción. Tamién va haber espaciu pa otros stands institucionales del propiu Ayuntamientu de Samartín, de l’asociación de comerciantes Ecosam, de Cogersa, de Radio Samartín o de la Asociación de Discapacitaos Rei Aurelio, ente otros.

Esti añu, y per primera vegada, la Oficina de Normalización Llingüística de Samartín del Rei Aurelio va contar con un espaciu pa esponer parte del trabayu que lleva faciendo a lo llargo de los sos 8 años d’esistencia. Amás d’esto, quier ser un puntu d’información pa toes aquelles persones (empresarios, miembros d’asociaciones, personal docente…) a les que-yos pudiera resultar útil el trabayu que se desendolca dende esti serviciu. Tamién se va ufiertar información sobre les actividaes que se van llevar a cabu a lo llargo de los próximos meses, ente les que destaquen varies esposiciones, una campaña de promoción toponímica o la organización d’unes xornaes de lliteratura infantil y xuvenil entamaes en collaboración cola asociación cultural Bocina Nalón. De too ello va dase completa información a lo llargo d’estos díes.

La FEMEX, amás de la participación de los espositores, va contar tamién con distintes actuaciones musicales y de baille, amás de pasarela de moda, espectáculu d’ilusionismu, talleres de tiru con arcu, corderu a la estaca y el tradicional certame municipal de ganáu, ente otres actividaes.