La India viende’l so patrimoniu históricu al meyor postor

El patrimoniu históricu na India ta en puya: El Gobiernu del país lleva tiempu anunciando que ye partidariu de qu’empreses privaes se faigan cargu del caltenimientu y de la comercialización de los llugares emblemáticos.

Esta decisión que representa una amenaza para munchos pos, llueñe de pensar que se van caltener meyor col pasu del tiempu (daqué que defenden los gobernantes), creen que se ta apurriendo les xoyes del país a manos ayenes.

L’Executivu indiu repitió la selmana pasada la so opinión en faciendo oficial que’l Grupu Dalmia Bharat, un conglomeráu especializáu en producir cementu y azucre, robló un contratu de cinco años col ministeriu de Turismu pa encargase de la xestión del Fuerte Coloráu. Esti monumentu del sieglu XVII y d’orixe musulmán, consideráu Patrimoniu de la Humanidá, ta allugáu a les puertes de la Vieya y ye nel so interior onde cada 15 d’agostu’l primer ministru pronuncia’l tradicional discursu que conmemora’l día de la independencia de la India.

Con esta acción, cumplese la campaña que teníen en mente los gobernantes y qu’animaba a empreses privaes a adoptar un llugar. La idea ye que, una vegada tengan dueñu, sía la mesma empresa quien ponga’l preciu de les entraes, va llevase la so recaldación y, inclusive, amuese la so marca por tol llugar y en los mesmos souvenirs. Como’l Fuerte Coloráu, esta acción ta pensada emplegala en más de 90 sitios, ente los que destaquen el mesmu Taj Mahal, el minarete de Qutub Minar o’l barcal de Chand Baori. Discutiniu tamién foi la clausa de dichu contratu, nel que se exime a les entidaes de cualquier responsabilidá énte posibles daños asocedíos nos monumentos mientres la so xestión. Como yera d’esperar, les crítiques nun tardaron en llegar. La oposición acusó formalmente al gobiernu por puyar al meyor postor les reliquies nacionales y ta promoviendo’l hashtag #IndiaEnVenta pa criticar la midida.

El voceru del partíu de los Gandhi, Pawan Kheran tamién amosó’l so malestar a la prensa: cuál va ser el próximu llugar insigne en ser arrendáu. “Tán apurriendo’l monumentu icónico a un negociu priváu. ¿Cuál ye’l so compromisu cola idea de la India, cola so hestoria?”. A lo qu’añedió xuna dulda: “Quiero preguntar al Partíu del Congresu qué fixeron ellos nos postreros 70 años porque tolos monumentos y les instalaciones a la so alredor tán nuna situación tarrecible”.

Pero’l mieu a la privatización nun ye la so única quexa, pos munchos partíos tamién tarrecen que se tracamundie la hestoria, pos van ser les mesmes empreses les encargaes d’ellaborar los folletos qu’espliquen l’orixe y hestoria de cada monumentu. Daqué colo que punxeron el berru al cielu el historiadores. “Los monumentos de primer nivel son les xoyes de la corona d’una nación. Nun tendría de xugar se con ellos. Ye entá más esmolecedor que les empreses nun se faigan responsables de nengún dañu (que causen)”, tuiteaba l’escocés residente en Delhi William Dalrymple.