La fin de selmana remata la sesta edición del Salón del Llibru Asturianu de Xixón

El Salón del Llibru Asturianu celebra estos díes la so sesta edición nuna carpa asitiada na cai Tomás y Valiente, xunto a la Plaza’l Parchís de Xixón. Manolo Abad va presentar güei vienres el llibru “Vasos sucios en la madrugada”, editáu por Septem.

Yá pal sábadu a les 12 hores, va tener llugar la presentación los cuentos infantiles “El viaxe de Tin y Ton” y “¿De qué tará fecha la lluna” de Miguel Rojo, asoleyaos por Pintar-Pintar.

A la una y media, La Cruz de Grau va presentar el llibru “La droga: el cuerpo y la cura”, de José Ramón Bahamonde y Pedro Carlos Martínez.

A les 19:30 hores, los poetes d’Aurora García Rivas, José Luis Rendueles y Pablo Texón van participar nun recital poéticu que va convertise na presentación de los sos últimos poemarios “Trinquilintainas”, “Ferruñu” y “La culpa y la lluz”, respectivamente.

El domingu, día de clausura, David M. Rivas va ufiertar la conferencia “La sidra asturiana, presente, pasáu y futuru”. Darréu va celebrase una preba de “Sidra Brut” del grupu Trabanco.

El día va rematar con Aurelio González-Ovies, que va presentar los cuentos “Cascoxu” y “El poema que cayó a la mar”, asoleyaos por Pintar-Pintar, va ser a les siete y media la tarde. Con estes presentaciones va rematase esta edición del Salón del Llibru Asturianu, organizáu pol Gremiu d’Editores d’Asturies.