Portada Sociedá La Estaya de la Llingua d’Avilés celebra con un vidiu’l Día de les Lletres

La Estaya de la Llingua d’Avilés celebra con un vidiu’l Día de les Lletres

by redacción asturnews

Esti vienres, 7 de mayu, Día de les Lletres Asturianes, la Estaya de la Llingua d’Avilés tien programaes actividaes pa emponderar una cita tan especial, una celebración na qu’asturianos y asturianes faen un homenaxe a la lliteratura escrita en llingua asturiana, a sos autores, y que se vien celebrando dende 1980.

La Estaya de la Llingua d’Avilés va emitir poles redes sociales un vidiu grabáu nel Teatru Palacio Valdés nel que distintos persones d’Avilés van lleer testos propios y tamién testos d’otros y otres autores d’époques pasaes que s’escribíen n’asturianu. Ente otres lleeránse obres de Marcos del Torniello, Bernardo Guardáu o Matilde de Soignie.

Pue vese dende les 00:00 hores d’esti mesmu día 7 de mayu nes redes sociales del Conceyu d’Avilés, na revista dixital de la Fundación Municipal de Cultura, la web de la Estaya de la Llingua y la plataforma dixital PlayPresta. Tamién va cuntara cola collaboración de mayores y pequeños, cantantes, escritores, actores y d’otros sectores profesionales. Buscóse que seya un homenaxe mui participativu y prestosu, too contao nel marcu incomparable del Palaciu Valdés.

Otra de les actividaes programaes pola Estaya ye la entrega de caxes del puzzle Ayalgues Asturianes a tolos centros educativos d’Avilés de Primaria, públicos y alcordaos, onde se dea l’asignatura de llingua asturiana. Esta iniciativa faise gracies a les donaciones de la empresa Acuto Xuegos, que diseñó dellos xuegos n’asturianu de la mano de Félix Fernández.

Tamién te podria gustar