La esposición del Quintu Centenariu de Pedro Menéndez aporta al Centru de La Lluz

Rematáu’l cursu escolar, la esposición itinerante que conmemora’l Quintu Centenariu de la Nacencia de Pedro Menéndez va poder visitase dende’l llunes 24 de xunu hasta’l 31 de xunetu nel Centru de La Lluz del conceyu d’Avilés.

Entamada pol Conceyu d’Avilés y diseñada pol profesor José Antonio Álvarez Castrillón, consta de diez paneles que recueyen la vida del marín nel so contestu históricu. L’amuesa camuda’l so periplu polos colexos mientres el cursu escolar y va esibise esti branu nos centros socioculturales de la ciudá

Rematáu’l cursu escolar, la esposición itinerante que conmemora’l Quintu Centenariu de la Nacencia de Pedro Menéndez treslládase esti branu de los centros educativos a los centros socioculturales d’Avilés. El primeru n’acoyer esta amuesa va ser la Biblioteca de La Lluz, dende’l llunes 24 de xunu, hasta’l 31 de xunetu.

L’amuesa, entamada pol Conceyu d’Avilés y diseñada por José Antonio Álvarez Castrillón, doctor y profesor de la Facultá de Formación del Profesoráu y Educación de la Universidá d’Uviéu, podrá visitase de forma llibre y gratuita nos horarios habituales de la Biblioteca del barriu (plaza de Frai Junípero Ferrucha, 2), de llunes a xueves llaborables, de 11 a 13.30 y de 16 a 20.30 hores, y los vienres llaborables, de 11 a 13.30 hores.

L’espaciu espositivu consta de diez paneles nos que se recueye la vida de Pedro Menéndez, el so contestu históricu, la realidá del otru llau del Atlánticu, les meyores técniques que desenvolvió y l’alcordanza que caltien n’Avilés como llugar de memoria. Amás, hai un espaciu especial para la primer ciudá que los europeos fundaron no que güei son los Estaos Xuníos d’América, San Agustín de la Florida, hermanada con Avilés.

Hasta’l momentu, 20 centros escolares, que cunten con alredor de 10.000 alumnes y alumnes, solicitaron acoyer la esposición nes sos instalaciones, y hai feches reservaes pa la so exhibición nellos hasta payares. Coles mesmes, yá se recoyeron pidimientos pa estender l’amuesa a otros conceyos d’Asturies.

El profesor José Antonio Álvarez Castrillón collaboró n’otres actividaes congresuales y espositives llevaes a cabu n’Avilés, como les dedicaes a los Fueros d’Avilés, Avilés na Edá Media o Avilés nel Camín de Santiago. Esta esitosa nueva amuesa enmarcase nel programa conxuntu d’actos que recuerden a Pedro Menéndez 500 años dempués de la so nacencia.