La Domus Aurea de Roma pue visitase anguaño como la esfrutó Ñerón

La Domus Aurea, la residencia mandada construyir en Roma pol emperador Ñerón, amuésase agora en tola so rellumanza con un percorríu de realidá virtual que dexa recrear un luxosu complexu palaciegu que quedó soterráu mientres sieglos.

“Por fin puedo empezar a vivir como un ser humanu”, foi la frase qu’usó l’emperador Ñerón cuando visitó per primer vegada’l so flamante Domus Aurea, que se construyera como palaciu priváu tres la gran quema de Roma del añu 64. Anguaño, los visitantes de la Domus Aurea pueden alicar parte de les sensaciones del emperador gracies al percorríu multimedia con gafes de realidá virtual que s’ufierta mientres les fines de selmana.

La instalación multimedia atopase na sala “Volta Dorata”, y per mediu de les gafes de realidá virtual los visitantes pueden reparar y “percorrer” la sala por completu, tal que foi concebida, amás de la manera na que se redescubrió na Renacencia, soterrada so tierra. La tecnoloxía dexa ver cómo se derrumbar l’actual muriu que tapa la sala y nel so llugar apaecen les columnes que precieden la entrada nel xardín, pero antes los visitantes pueden parase a reparar los suntuosos frescos y mármoles coloriaos de la estancia.

La lluz que provien del esterior conduz escontra’l fachendosu xardín nel que Ñerón gociaba d’unes vistes privilexaes, anque non del Coliséu como na actualidá, yá que foi construyíu pocos años dempués, sinón del llagu artificial qu’había nel so momentu. “Naturalmente, el complexu foi bien criticáu ya inclusive odiáu polos sos contemporaneos, porque de dalguna manera l’emperador Ñerón tomara pal so provechu (…) tol centru de la ciudá”, esplicó Elisabetta Segala, arqueóloga de la Sobreintendencia de Bienes Arqueolóxicos de Roma la selmana pasada na so presentación. Segala amestó que tres la muerte de Ñerón, solu cuatro años dempués de la construcción, la Domus Aurea foi “lliteralmente barrida polos emperadores socesivos por motivos políticos” y construyéronse edificios públicos nesta zona que fuera privatizada.

L’espaciu qu’escurrió Ñerón ocupaba unes 80 hectárees, pero anguaño la Domus Area identifícase solamente col pabellón nel interior del parque del Colleo Oppio, clisáu pola cercanía del Coliséu, polo que Segala considera “importante” el so percorríu virtual porque ye “un monumentu difícil, que nun se ve”. Xuntu al percorríu virtual, a los visitantes de la Domus Area ufiértase-yos tamién un vídeu esplicativu de la hestoria del monumentu y un percorríu poles ruines de lo qu’a metá del sieglu I foi un maxestosu palaciu pero qu’agora s’atopa soterráu y en fase de reformes, d’ende la necesidá de los visitantes de llevar un cascu de seguridá mientres tola so estancia.