La crítica asturiana premia a Miguel Allende y Xandru Fernández

Esta tarde, a les ocho y media, va facese entrega de los Premios de la Crítica 2004 nel cafe Apolo d’Uvieu, que nesta ocasión, reconocen, na modalidá de los meyores llibros n’asturianu, el trabayu de Miguel Allende, pol poemariu “Pallabres de payaso” y la novela “Les ruines” de Xandru Fernández.

Xandru Fernández (Turón,1970), escritor precoz y prolíficu, ye seguramente ún de los meyores novelistes asturianos d’anguaño, teniendo publicaes noveles como “El silenciu en fuga”, “Tráficu de cuerpos”, “El suañu de los páxaros de sable” y “Los homes de bronce”. Como poeta, publica “Primer bestiariu” en 1990, al que dempues siguen “Breviariu de la diáspora”, “Lletra muerto” y “Servidume”. “Les ruines” ye la última novela de so, na que retrata la familia de Rosa l’Alemana y del so home, Goyo Godina, militante antifranquista que muerre n’accidente de mina. Alredol d’ellos y del valle, enguedeyense un cientu de rellaciones marcaes pol desarraigu y les dificultaes comunicatives ente les persones.

Miguel Allende (Llaviana, 1960) recueye en “Pallabres de payaso” munchos de los poemes escritos nos primeros años de la decada de los 80, al abellu de la tertulia lliteraria ‘La Seronda’. Pesie a ser un primer poemariu, la voz d’Allende sorprendió pola ironía cola que’l personaxe (payaso) enfrenta la vida, a travies d’una voz mui personal na que se reconocen tendencies mui estremaes, como les formes clásiques, castellanes, asturianes, franceses y estaounidenses; y nel que destaquen les influencies cinematográfiques y sobremanera la música.