La Coordinadora Ecoloxista d’Asturies alega contra la crianza d’esturiones en Parres

La Coordinadora Ecoloxista d’Asturies presentó alegaciones al Conceyu de Parres con motivu del tramite de la llicencia municipal pa la planta p’actividaes de acuicultura pa la crianza d’esturiones na localidá de Sotu de Dueñes nel ríu Piloña (afluente del ríu Sella), porque les especies d’esturión emplegaes en acuicultura son el siberianu (Acipenser baerii) y el del Adriáticu (Acipenser naccarii) y son especies con altu riesgu de ser invasores, que casualmente desapaecieron hai unos meses del catálogu d’especies invasores ensin que se sepa la razón.

La Coordinadora repite al Conceyu lo mesmo que treslladó al Principáu: ·que son les numberoses duldes que nos supon el proyectu, duldes que tán ensin resolver nin pol Principáu, nin pola empresa nin pol conceyu a pesar del tiempu trascurrido dende la so presentación”.

El ríu Piloña forma parte del LIC Ríu Sella de la Rede Natura 2000, ye un espaciu singular d’altu valor natural, d’ende que nun se pueda poner lo que sía a cualquier preciu. Entendemos qu’hai numberoses duldes sobre esti proyectu, ensin respuesta.

La dulda más importante ye que les especies d’esturión emplegaes en acuicultura son el siberianu (Acipenser baerii) y del Adriáticu (Acipenser naccarii) y son especies con altu riesgu de ser invasores, como asina tuvieron catalogaes hasta esti branu, que sosprendentemente se quiten del nuevu catalogo d’especies invasores a pidimientu de daquién. A la Coordinadora abulta-y ablucante “que si les especies usaes son hibrides ensin posibilidá de reproducción como diz la empresa, como ye que parte de l’actividá de la sociedá va ser la producción de caviar (daqué que nun dexa de ser la güeva de les femes fértiles)”.