La conceyala de Mocedá d’Avilés propón una campaña contra les agresiones sexistes mientres tol añu

La conceyala d’Igualdá y Mocedá, Raquel Ruiz, aconceyó esti llunes 31 de xunetu con diversos colectivos y entidaes a les que convocó pa concretar les actuaciones que se van a llevar a cabu contra les agresiones sexistes na ciudá. Estes actuaciones van ponese en marcha coincidiendo coles fiestes de San Agustín y van desenvolvese mientres tol añu.

Ruiz esplicó que “la campaña institucional a desenvolver va tar basada nun personaxe creáu espresamente al traviés del cual van espublizase mensaxes y actitúes pola igualdá, los bonos tratos y el fomentu de valores de convivencia en positivu en redes sociales y n’espacios d’ociu nuevu”. La imaxe y conteníu de la campaña va presentase nos próximos díes y la conceyala esplicó que se va poner en marcha aprovechando les fiestes de San Agustín pero “naz con vocación de continuación a lo llargo de tol añu”.

Amás, Ruiz comprometese a desenvolver una propuesta plantegada na xunta por Muyeres Nueves d’Asturies, consistente na instalación de meses informatives nes que se van apurrir folletos y va ufiertar información sobro’l protocolu d’actuación en casu de violencia sexista y va espublizase la esistencia del teléfonu 016 nel que poder denunciar les agresiones. Estes meses van instalar nel cascu históricu’l sábadu 19, vienres 25 y domingu 27 d’agostu. Van Ser atendíes por mozos voluntarios de diverses entidaes por personal con formación específica. Otra de les víes de contactu pa buscar asesoramientu directu y personal nesta materia ye’l Centru d’Atención Sexual d’Avilés (CASA), coles sos redes sociales permanentemente actives.

Más información