La Collá va acoyer esti sábadu’l tradicional homenaxe al Texu

Redacción.

La Tertulia Cultural El Garrapiellu va celebrar esti sábadu 30 de xunu a partir de les 11:30 hores de la mañana la Ceremonia-Xuntanza del Texu, que va celebrase nel Texu de La Collán, xunto a la Ilesia de San Pedro de la Collá, Siero. L’actu cuenta col apoyu de l’Asociación Cultural Amigos de la Parroquia de La Collá, de creación reciente.

La ceremonia, cola que diverses asociaciones ecoloxistes y asturianistes intenten la declaración de Patrimoniu de la Humanidá de los Texos “Cultos” y texeos silvestres, va entamar a les 11:30 cola alborada de Gaita col Conceyu de Gaiteros. A les 12:00 va oficiase una misa n’asturianu col Coleutivu Manuel Fernández de Castro, que va tar cantada por Mari Luz Cristóbal Caunedo, Milio Trabanco a la gaita y Pedro Pangua al tambor. Too ello va celebrase nes ruines romániques de la Ilesia Vieya de San Pedro de la Collá.

Darreu, a les 12:30 va facese Homenaxe-cabudañu al Gaiteru de Veriña y baille de la Danza Prima alredor del Texu, cola ‘Bendición Bárdica’, al cargu del Bardu Errante, personaxe artísticu de Ánxel Nava. Pa rematar la mañana va celebrase una xinta nel prau del Texu. A les cuatro la tarde va celebrase un ‘Conceyu del Texu’, con representantes de toles asociaciones esmolecíes pola conservación del texu pa, según los organizadores, “ser a tomar una determinación conxunta pa protexer los árboles más antiguos d’Asturies”.

La parroquia de La Collá tuvo d’actualidá apocayá pola entrega per parte de l’Academia de la Llingua, del premiu al trabayu de recoyida de toponimia de la parroquia, obra d’Inaciu Galán y Marta Lozano Carbajal, obra que va ser presentada nos próximos meses al pie d’esti Texu de La Collá.