La Casa Conceyu de Xixón acueye la presentación del Premiu Fierro Botas 2011

La obra ganadora del IV Premiu d’ensayu Fierro Botas va presentase esti xueves, 17 de mayu, a les siete la tarde, nel salón de receiciones de la Casa Conceyu de Xixón. La obra “Mitoloxía de los santos n’Asturies”, ta escrita por Alberto Álvarez Peña (Xixón, 1966), perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros “Asturias mágica” y “Cuélebres, culuobras, culiebres y culiebrones. La culiebra na mitoloxía asturiana”. La obra asoleyada agora por Trabe Ediciones rastrexa pente la cultura popular y les ilesies asturianes los raigaños paganos de los que bebió y s’alimentó’l cristianismu de los primeros años.

Si, como ta de moda dicir, Europa ye lo que ye pola influencia del cristianismu, nun ta demás alcordar qu’esti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l’Asturies d’anguaño.

«Si nun yes a vencer al enemigu, únite a él». Esto paez ser que pensó’l cristianismu primitivu a la d’enfrentase a les creencies anteriores bien enraigonaes ente la xente del pueblu. Cristianizaes les fiestes paganes, hubo de buscar agospiu dientro’l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d’axudar a los humanos na comprensión de los sos fenómenos: d’esa manera los santos católicos nun son otro qu’aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos.