Portada Sociedá La Caravana pola Oficialidá arranca na cuenca del Nalón

La Caravana pola Oficialidá arranca na cuenca del Nalón

by asturnet

La Caravana pola Oficialidá arrinca esti sábadu 4 dende la cuenca del Nalón con una concentración de coches énte la estación d’autobuses de La Felguera a les once de la mañana. Pela tarde a les 19,00 hores nel teatru municipal de San Martín del Rei Aureliu en L’Entregu va celebrase un festival coles actuaciones de Tuenda, Nuberu, Carlos Rubiera, la banda de gaites del conceyu agospiador y con un recital de poesía a cuenta de los miembros de la tertulia Malory.

El conciertu ye l’actu central de la Caravana pola Oficialidá, que va recorrer les poblaciones principales del vai del Nalón, dende Llangréu hasta La Pola Llaviana informando a los ciudadanos de la necesidá de que se reconoza l’asturianu oficial. A la caravana van poder sumase toles persones que quieran.

Tanto la marcha de coches pel valle como l’actu postreru nel Teatru de L’Entregu tienen como oxetivos reclamar la inclusión de la oficialidá de la llingua asturiana nel Estatutu d’Autonomía y facer que los ciudadanos garren conciencia de la necesidá de protexer y dignificar un patrimoniu de toos como ye l’asturianu. La xornada del sábadu va ser la primera d’otres asemeyaes que se van desendolcar pelos conceyos d’asturies y coles que’l Conceyu Abiertu pola Oficialidá (CAO) quier sacar la reivindicación llingüística de les grandes ciudaes y acercala a los ciudadanos de les villes y pueblos.

Tamién te podria gustar