La 30 Selmana de les Lletres tien yá programa d’actos

La Selmana de les Lletres Asturianes qu’algama esti añu trenta ediciones, va n’esta ocasión a la figura de la narradora y periodista Enriqueta González Rubín y yá tien programa d’actividaes pa los díes 4 al 8 de mayu, y sobremanera nos conceyos de Ribeseya y Llanes.

El llunes 4 van presentase los actos na Casa Cultura de Llanes, amás de la edición del llibru “Enriqueta González Rubin, el sinciu d’ua escritora del XIX”, volume ilustráu al rodiu de la escritora que va repartise de baldre nes llibreríes d’Asturies, el vienres 8, Día del Llibru Asturianu.

Esi mesmu día va presentase la esposición “Viaxe al tiempu d’Enriqueta González Rubín”, que va tar abierta al públicu hasta’l 16 de mayu, n’horariu d’11 a 13 y de 18 a 20 hores, na Casa Cultura de Ribeseya.

El martes 5 va presentase na Casa Cultura de Llanes la edición facsimilar de la obra atopada l’añu pasáu, y hasta entós perdida, “Viaxe del tíu Pacho el Sordu a Uviedo”, amás de celebrase una conferencia de la escritora Ángeles Caso col títulu “Las olvidadas: una historia de mujeres creadoras”.

El miércioles 6, los actos treslládense a Uviéu, onde los políticos asturianos van facer una llectura pública de testos n’asturianu nel Salón Europa de la Xunta Xeneral.

Yá pela tarde, a partir de les 19 hores, va entregase’l Premiu Arbidel de cuentos eróticos en Ribeseya.

El xueves 7 de mayu va ocupalu l’actu escolar qu’esti añu va tener por sede Ribeseya y onde van entregase dellos premios infantiles. De tarde y tamién na villa del oriente, va celebrase la conferencia “L’aguya y la pluma: vida y obra d’Enriqueta González Rubín, a cargu de Taresa Fernández Lorences.

La xornada cabera d’esta Selmana de les Lletres va celebrase’l vienres con un actu institucional n’homenaxe a Enriqueta González Rubín qu’inclúi la inauguración d’una plaza conmemorativa y una ruta lliteraria pelos paisaxes de la obra de Rubín, amás de la presentación de la Obra completa de la escritora. Amás, a lo llargo de tol día la mayor parte de les llibreríes d’Asturies celebren el Día del Llibru Asturianu, con un descuentu del 10% y regalu del llibru yá citáu.

El sábadu la RPA va ufrir un programa sobre la vida d’Enriqueta González Rubín dientro del espaciu “Nomes d’Asturies”.

Programa completu de la Selmana de les Lletres