L.lena entama una campaña de promoción del asturianu na hostelería

El Serviciciu de Normalización Llingüística de L.lena entamó una campaña empobinada a la promoción del usu del asturianu nel sector de la hostelería. La iniciativa consite na edición y distribución, pelos establecimientos del sector, de más de 10.000 materiales énte rótulos, carteles y manteles de papel.

La edición d’estos materiales tien l’obxetivu d’afitar l’usu del asturianu y frenar el retrocesu al que se ve afectáu. Los materiales tán adaptaos a la variante llingüística del conceyu de L.lena.
La campaña cuenta col sofitu, amás del Ayuntamientu del que depende’l Serviciu de Normalización de L.lena, de la Rede de Servicios de Normalización Llingüística y de l’asociación municipal d’hosteleros de L.lena (Asholena). El presupuestu de la campaña normalizadora ye de 4.000€ qu’aporten les subvenciones pa la difusión y fomentu del asturianu qu’añalmente concede la Conseyería de Cultura.

La campaña de normalización faese nel ámbitu de la hostelería por ser esti un de los entornos más importantes nes relaciones de la ciudadanía. Poro ye afayadizo poner los preseos necesarios al serviciu de la ciudadanía pa dignificar l’usu del idioma, asina como pa conservar el vocabulariu asturianu. Los materiales que se van entamar a distribuyir son

• Manteles individuales, con una riestra pallabres venceyaes a la comida
• Pegatines cola marca de calidá de la campaña, pa la identificación de los establecimientos collaboradores cola campaña de normalización.
• Rótulos d’abierto/peslláo, homes, muyeres, teléfonu, privao y acutao.

La campaña desendólcase conxuntamente col restu de conceyos de la Rede de Servicios de Normalización Llingüística.