L’asturianu ye la novena llingua más tornada d’UBUNTU

Xandru Armesto, del coleutivu Softastur, tuvo esplicando xunto a otros miembros d’esta asociación qué ye esactamente’l software llibre, qué momentu vive y qué posibilidaes abre pa una llingua minorizada y marxinada pol so propiu gobiernu, como l’asturiana, na Tertulia Enrique García Rendueles y nuna de les xornaes con más participación. La charra y el posterior alderique sirvió pa que munchos resolvieren duldes alredor del software llibre y pa dar a conocer la bayurosa ufierta de programes que permite remanar el sistema operativu Ubuntu, que ta tornáu al asturianu dende va tiempu.

Amás los miembros de Softastur dieron a conocer el so llabor, que los convierte, pese a ser un grupu pequeñu, nún de los equipos de torna con más trabayu fechu, siendo l’asturianu nel añu pasáu la novena llingua más tornada n’Ubuntu. Los miembros de Softastur convidaron a participar de les sos xornaes d’instalación, pa pasase a Ubuntu nos ordenadores, y a los conocedores del asturianu, a sumase como traductores de programes.

El movimientu estudiantil y la defensa de la Universidá pública, el xueves 24 de marzu

La Tertulia recibe esta selmana a Santiago Fano, militante del movimientu estudiantil y miembru del Conseyu d’Estudiantes de la Universidá d’Uviéu, que va falar de la difícil situación de la Universidá d’Uviéu anguaño y de les reivindicaciones del movimientu de base por una Educación pública y de calidá.

Semeyes de la tertulia del xueves pasáu