L’Arribada convoca la segunda edición del Premiu Timón a la carrera lliteraria

L’Asociación Cultural l’Arribada convocó esta selmana la segunda edición del Premiu Timón, un certame que convoca esti añu “col envís de facer reconocencia d’una trayectoria lliteraria y/o’l llabor de promoción de la lliteratura asturiana”. El premiu quier convertise nuna referencia na reconocencia de la carrera lliteraria de los autores más veteranos de la lliteratura asturiana y l’añu pasáu recibiólu la escritora Nené Losada.

El premiu entrégase cada añu na Arribada, la “vagamar lliteraria” qu’enllena Xixón de lliteratura asturiana al traviés d’actividaes abiertes al públicu asturianu a lo llargo de más de diez díes cada mes de setiembre.

Les candidatures van poder presentase por una persona o per aciu d’un coleutivu al corréu lletrónicu arribada_sectec@yahoo.es . Pa esta edición opten al premiu los/es escritores y/o promotores de la lliteratura n’asturianu que nacieren nel añu 1958 o enantes.

La candidatura constará d’un informe de l’activida lliteraria del autor lo más completu posible y una xustificación de les razones de la presentación de candidatura y el plazu pa presentar candidatures va tar abiertu hasta l’1 de setiembre de 2008.

Al efeutu de fallar el premiu, l’Asociación Cultural l’Arribada aconceyará un xuráu integráu por persones venceyaes a la cultura del país. El fallu nun va poder recurrise y la entrega del mesmu va ser en Xixón demientres la celebración de l’ARRIBADA 2008 y va constar d’una escultura diseñada a costafecha por un artista asturianu.

D’otra banda, l’Asociación L’Arribada prepara yá dende va meses la tercer edición de l’Arribada y mañana xueves van celebrar un conceyu de la directiva nel que va escoyese la nueva directiva y nel que van decidise delles novedaes del añu que vien.

Amás, apocayá, l’Asociación estrenó un blogue nel que van dir dando anuncia de les novedaes y abriendo un espaciu pa les propuestes y les opiniones.

Blogue de l’Asociación Cultural l’Arribada